رووداو دیجیتاڵ
فڕۆکە F16 کانی سوپای عێراق، گرووپێکی داعش و شوێنی مانەوە و تونێلەکانیان لە سنووری پارێزگای کەرکووک دەکەنە ئامانج.
رۆژی پێنجشەممە، 20-06-2024 شانەی راگەیاندنی ئەمنیی عێراق رایگەیاند، لە ناوچەی وادی شای لە سنووری فەرماندەیی ئۆپەراسیۆنەکانی کەرکووک، کاژێر 6:30 بەیانیی ئەمڕۆ فڕۆکەی F16ی سوپای عێراقی گرووپێکی سێ کەسی چەکدارانی داعش و مۆڵگە، ئەشکەوت و تونێلەکانیان کراونەتە ئامانج.
شانەی راگەیاندنی ئەمنیی عێراق دەڵێ، دواتر وردەکاریی زیاتر لەبارەی ئەو هێرشەیان بڵاودەکەنەوە.
بەپێی توێژینەوەیەکی سەنتەری رافیدەین بۆ دیالۆگ، کە سەنتەرێکی عێراقییە، لە ساڵی 2023دا داعش 189 هێرشی لە ناوچە جیاجیاکاندا کردووە.
زۆرترینی کردەوەکانی داعش بەپێی پارێزگاکانی داعش لە پارێزگای ئەنبار بووە بە 47 کردەوە، لە پارێزگای کەرکووک 39 کردەوە و لە پارێزگای دیالە 37 کردەوەی کردووە.
بەپێی توێژینەوەکە کە پشتی بە داتای دامەزراوە فەرمییەکانی عێراق بەستووە، هێرشەکانی داعش لە چوار ساڵی رابردوودا بەمشێوەیە بوون:
- ساڵی 2020: 1459 کردەوە
- ساڵی 2021: 1113 کردەوە
- ساڵی 2022: 484 کردەوە
- ساڵی 2023: 189 کردەوە
لە توێژینەوەکەدا دەردەکەوێت کردەوەکانی داعش لەنێوان شەڕی راستەوخۆ بە چەک و نارنجۆک تاوەکو چاندنی بۆمب و کردەوەی دیکە بووە بە پێچەوانەی هێرشەکانی پێشووی کە زیاتر پشتی بە خۆکوژ و ئۆتۆمبێلی بۆمبڕێژکراو و چەکی قورس دەبەست.
رێکخراوی داعش لە حوزەیرانی ساڵی 2014 هێرشی کردە سەر شاری موسڵی ناوەندی پارێزگای نەینەوا و کۆنتڕۆڵی کرد و لە 2017 کۆتایی بە دەسەڵاتی داعش لە پارێزگاکە و ناوچەکانی دیکەی عێراق هێنرا. مەزەندە دەکرێت داعش لەو ماوەیەدا نزیکەی 20 هەزار کەسی کوشتبێت.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ