رووداو دیجیتاڵ
شاخەوان عەبدوڵڵا، جێگری سەرۆکی پەرلەمانی عێراق دەڵێت، لە رێگەی ئۆتۆمبێلێکەوە تەقە لە نووسینگەی کەرکووکیان کراوە و لەلایەن پاسەوانەکانییەوە وەڵام دراوەتەوە، بەڵام "ئۆتۆمبێلەکە هەڵاتووە."
رۆژی دووشەممە، 20-11-2023، لە راگەیێندراوێکدا شاخەوان عەبدوڵڵا، جێگری سەرۆکی پەرلەمانی عێراق رایگەیاند، "بەرەبەیانی ئەمڕۆ لە کردەوەیەکی ترسنۆکانە تەقە لە نووسینگەی کەرکووکمان کراوە،" تەقەکەرەکان لە ئۆتۆمبێلێکی جۆری "تووێتا کامری"ـدا بوون و هەڵهاتوون.
لە راگەیێندراوەکەدا هاتووە، شاخەوان عەبدوڵڵا داوا لە هێزە ئەمنییەکانی کەرکووک دەکات ئەنجامدەرانی کردەوەکە بدۆزنەوە.
شاخەوان عەبدوڵڵا جێگری سەرۆکی پەرلەمانی عێراق و ئەندامی کۆمیتەی ناوەندی پارتی دیموکراتی کوردستانە دەڵێت، "خەڵکی بەشەرەفی کەرکووک دڵنیادەکەینەوە هێرشەکە لە خزمەتکردنی سەرجەم پێکهاتەکانی کەرکووک رامان ناگرێت."
دەقی راگەیێندراوەکەی شاخەوان عەبدوڵڵا، جێگری سەرۆکی پەرلەمانی عێراق و ئەندامی کۆمیتەی ناوەندی پارتی دیموکراتی کوردستان:
بەناوی خودای گەورەو میهرەبان
بەرەبەیانی ئەمڕۆ لەکردەوەیەکی ترسنۆکانە تەقە لەنوسینگەی کەرکوکمان کرا و دەستبەجێ لەلایەن پاسەوانەکانەوە وەڵام درایەوە و ئۆتۆمبێلەکە کە لەجۆری تویتا کامریە پێکهێنرا، بەڵام توانیویەتی هەڵبێت ، وێڕای داواکردنمان لەدەزگا ئەمنییەکان بۆ دۆزینەوەی ئەنجامدەرانی ئەم کردەوەیە، خەڵکی بەشەرەفی کەرکووک دڵنیادەکەینەوە ئەم هێرشەی ئەمشەویش هاوشێوەی هێرشەکانی پێشوو لەخزمەت کردنی سەرجەم پێکهاتەکانی کەرکووک رامان ناگرێت.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ