شۆفێرانی بارهەڵگر چەندین رۆژە لە باشماخ ماونەتەوە.
رووداو دیجیتاڵ
شۆفێرانی بارهەڵگری دەروازەی نێودەوڵەتیی باشماخ، 4 رۆژە بەهۆی کەمبوونەوەی ئاڵوگۆڕی بازرگانی لە باشووری کوردستان ماونەتەوە. پشوو و خەویان لەنێو بارهەڵگرەکانیانە.
دیاکۆ محەممەد، خەڵکی رۆژهەڵتی کوردستانە و شۆفێری بارهەڵگرە و دەڵێت، "لێرە شوێنی حەوانەوە و خەوتن نێو بارهەڵگرە، ئێستا بەبۆنەی شەڕ لەسەر سنوور پشکنینی زۆر دەکەن، جاران ئۆتۆمبێل زیاتر دەهات و دەرۆیشت، بەڵام ئێستا لەبەر ئەم بارودۆخە کەسمان نەبینیوە بێت. چەند رۆژە قیرم بارکردووە بۆ بەندەر عەباس، بەڵام سێ رۆژە لە سەرەم نەهاتووە."
حوسین رەسوڵ، شۆفێرێکی دیکەی رۆژهەڵاتی کوردستانە و باس لەوە دەکات، "ئەو بارەی ئەوسا لە یەک رۆژ تەواو دەبوو، ئێستا بووەتە 4 رۆژ، من باشم ئەوانەی قیریان پێیە دەچێتە 7 رۆژ، بەڵام دووری ماڵ و منداڵ و ئەوەی وڵاتەکەمان وایە ئەوەیان ناخۆشە."
لە هەردوو دەروازەی پەروێزخان و نیمچە فەرمی کێلێ هاتووچۆی بازرگانی سست بووە، بەڵام تاوەکو ئێستا هیچ کاریگەری لەسەر نرخی کاڵا و شتومەک نەبووە.
دیار محەممەد، بازرگانە لە دەروازی باشماخ و دەڵێت، "دەروازەکە کێشەی نییە کراوەیە، دەروازەی باشماخ، پەروێزخان و حاجی ئۆمەران کراوەن و لاوەکییەکانی داخستووە. بارەکان لە لای ئێران بەهۆی شەڕەوە کەمی کردووە. لە رووی خۆراکەوە نزیکەی 9-7 مانگە بەغدا ناهێلێت، خۆراکی ئێرە بچێتە نێوەڕاست و خوارووی عێراق، سوپاس بۆ خوا کۆگاکان پڕن."
لە هەر سێ دەروازەی باشماخ، پەروێزخان و دەروازەی نیمچە فەرمی کێلێ زیاتر لە هەزار بارهەڵگر هەن کە ئاڵوگۆری بازرگانی دەکەن بەڵام بەهۆی کاریگەرییەکانی شەری ئیسرائیل ئێران بەرێژەیەکی بەرچاو کەمی کردوە
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ