رووداو دیجیتاڵ
دەزگای ئاسایشی نیشتمانیی عێراق رایگەیاند، لە ئۆپەراسیۆنێکی تایبەتدا لە پارێزگای کەرکووک، تۆڕێکی رێکخراوی گەندەڵییان هەڵوەشاندووەتەوە و 18 تۆمەتباریان دەستگیرکردووە. لەنێویاندا فەرمانبەری حکومی، کارمەندی بانک و وەبەرهێنەر هەن. تۆڕەکە نزیکەی 8 ملیار دینار سامانی گشتییان بەهەدەر داوە.
بەگوێرەی راگەیێندراوێکی فەرمیی دەزگای ئاسایشی نیشتمانی کە ئەمڕۆ پێنجشەممە، 21-08-2025، بڵاویکردووەتەوە، ئۆپەراسیۆنەکە دوای وەرگرتنی رەزامەندیی دادوەر کراوە و ئامانجی لێدان بووە لەو تۆڕەی "بە شێوەیەکی رێکخراو ساختەکارییان لە کەرتی خانووبەرەدا کردووە."
لێکۆڵینەوەکان دەریانخستووە کە تۆڕەکە دوو شێوازی بۆ گەندەڵییەکانی بەکارهێناوە، یەکەم: وەرگرتنی قەرزی وەهمی لە رێگەی پێشکێشکردنی بەڵگەنامەی ساختەوە. مامەڵەیان بە ناوی هاووڵاتییانی بێئاگا کردووە و بەڵێنیان پێداون یەکەی نیشتەجێبوونیان بۆ دابین بکەن. لەم چوارچێوەیەدا، دەست بەسەر 30 مامەڵەی دیکەدا گیراوە کە ئامادەبوون بۆ خەرجکردن.
دووەم: هەوڵدان بۆ دەستگرتن بەسەر پارچە زەوییەکی حکومیدا بە رووبەری 57 هەزار و 500 مەتر دووجا، ئەمەش لە رێگەی بەکارهێنانی بەڵگەنامەی ناڕاست و ساختەوە بووە بۆ داگیرکردنی موڵکی دەوڵەت.
بەپێی راگەیێندراوەکەی دەزگای ئاسایشی نیشتمانی "ئۆپەراسیۆنەکە بووەتە هۆی رێگری لە بەهەدەردانی نزیکەی 8 ملیار دیناری عێراقی" و سەرجەم تۆمەتبارەکانیش رەوانەی لایەنی دادوەریی پەیوەندیدار کراون بۆ گرتنەبەری رێکاری یاسایی پێویست لە دژیان.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ