ئۆجەلان: دەمەوێ رێگری لە ناشتنی گەنجان و شیوەنی دایکان بکەم

 

 

کۆمەڵەی هاوکاری و پشتیوانیی کەسوکاری ئەوانەی نزیکەکانیان لەدەستداوە لە ئەنادۆڵ (ئانکا-دەر)، رۆژی یەکشەممە 21-12-2025، چوارەمین کۆنگرەی ئاسایی خۆی لە ئیستەنبووڵ سازکرد و عەبدوڵڵا ئۆجەلان، رێبەری زیندانیکراوی پارتی کرێکارانی کوردستان (پەکەکە) پەیامێکی بۆ کۆنگرەکە نارد.

 

پێش خوێندنەوەی پەیامەکە، مەراڵ دانیش بێشتاش، پەرلەمانتاری پارتی یەکسانی و دیموکراسیی گەلان (دەم پارتی) گوتارێکی پێشکێشکرد و رایگەیاند، لە قۆناخی پێکداداندا خەڵک ئازاری زۆری چەشت و گوتی: "ئێمە ئیدی نامانەوێت خوشک و براکانمان لەدەست بدەین. بە شەهیدەکانمانەوە سەربەرزین؛ ئەوان هەموویان بەهای ئەم گەلەن و ئەگەر ئەمڕۆ بتوانین باسی دیموکراسی و ئازادی بکەین و بە زمانی خۆمان بدوێین، ئەوە لە چاکەی ئەوانە".

 

بێشتاش پرۆسەی چارەسەریی نێوان حکومەت و لایەنەکانی بە بەهادار وەسفکرد و گوتی:" ئێمە ئەم پرۆسە بەبێ چەک و بێ رشتنی خوێن و بێ لەدەستدانی هیچ مرۆڤێک، لە رێگەی سیاسەتی دیموکراسییەوە بەرێوەدەبەین".

 

 

دوای گوتارەکەی بێشتاش، پەیامەکەی ئۆجەلان بە هەردوو زمانی تورکی و کوردی خوێندرایەوە.

 

ئۆجەلان لە پەیامەکەیدا جەختیکردووەتەوە، وەفادارییان بۆ یادی شەهیدان ئەوەیە کە کۆمەڵگەیەکی دیموکراسی لە کەشێکی ئاشتییانەدا بنیات بنێن و دەڵێ: "یادی هەموو ئەو شەهیدانەی خەبات دەکەمەوە کە لەپێناو ئازادی، شکۆ و ژیانی یەکسانی گەلان لەم خاکەدا گیانیان بەخشیوە. قوربانیدانی ئەوان وەک هۆشیاری، ئیرادە و پاشخانێکی مێژوویی لە کاروانی ئازادیی ئەم گەلەدا دەژی. ئەوان ویژدانی خەباتی ئێمەن و راستییەکی مێژوویین کە شوێنەواریان لە بیرەوەریی گەلەکەماندا ناسڕێتەوە".

 

ئۆجەلان لە پەیامەکەیدا پەنجە دەخاتە سەر ئەو کارەی ئێستا پێویستە بکرێت و دەڵێ: "دەبێ بە راشکاوی بگوترێت؛ لەم قۆناخەدا خەباتی ئازادی، هونەری رێکخستنی ژیانە نەک زیادکردنی مردن. یادی شەهیدانمان نەک بە لەدەستدانی نوێ، بەڵکو بە بونیاتنانی ئەو ژیانە دیموکراسی، یەکسان و شکۆمەندانەیە مانابەخش دەبێت کە ئەوان لەپێناویدا بەرگرییان کرد. هەر لەدەستدانێک بۆ من هاوکات، هۆکارێکی خەباتە و ئازارێکی قورسیشە کە لە دڵمدا هەڵی دەگرم. دەمەوێ رێگری بکەم و نەهێڵم یەک گەنجی دیکە بنێژرێت و نەهێڵم دایکێکی دیکە بۆ مەرگی جگەرگۆشەکەی شیوەن بکات".

 

رێبەری زیندانیکراوی پەکەکە راشیگەیاند، وەفاداریی راستەقینە، زەمینەسازی نییە بۆ مردنی زیاتر، بەڵکو نیشاندانی ئازایەتییە لە دروستکردنی زەمینەی سیاسی و کۆمەڵایەتی بۆ خەباتێکی ئاشتییانە.

 

هەروەها دەڵێ: "ئەو میراتەی ئەوان بۆیان جێهێشتووین، بەردەوامبوونی شەڕ نییە. بەڵکو نیشاندانی ویستی چارەسەری دیموکراسییانەیە. ئەوان لەپێناو ئەوە خەباتیان کرد، چونکە باوەڕیان وابوو ئەو داهاتووە گونجاوە کە گەلان بە یەکەوە و بە ئازادی تێیدا دەژین."

 

لەبارەی ئەوەی کە ئەرکی لایەنەکان لە پرۆسەی چارەسەریدا چییە؟ عەبدوڵڵا ئۆجەلان رایگەیاند: "ئەرکی ئەمڕۆمان ئەوەیە ئەم پاشخانە مێژووییە بە ئاشتی بڕازێنینەوە و لەسەر بنەمای تەبایی دیموکراسی، دەرگەی قۆناخێکی نوێ بکەینەوە. رێزی راستەقینە، رێگریگرتنە لە زیانی نوێ. یادکردنەوەی راستەقینە، گەیاندنی خەباتە بە ئاستێکی پێشکەوتووتر، هۆشیارانەتر و ژیاندۆستانەتر".

 

لە کۆتایی پەیامەکەیدا عەبدوڵڵا ئۆجەلان رایگەیاندووە: "بەو هەست و بەرپرسیارییەوە، سەری رێز لەبەردەم یادی هەموو شەهیدانی خەبات دادەنەوێنم و بە رێز و خۆشەویستییەکی بێپایانەوە سڵاو لە کەسوکاریان دەکەم".

 

کۆنگرەی کۆمەڵەی هاوکاری و پشتیوانیی کەسوکاری ئەوانەی نزیکەکانیان لەدەستداوە لە ئەنادۆڵ (ئانکا-دەر)، بە هەڵپەڕکێ و پیرۆزبایی کۆتاییهات.