رووداو دیجیتاڵ
وەکو دەستپێکی بەرهەمی بەهارە، کەنگر کەوتووەتە بازاڕەکانی هەرێمی کوردستانەوە، هەروەها هەڵووژە لە تورکیاوە هاوردە کراوە و کیلۆی بە 125 دۆلار دەفرۆشرێت.
سەروەر عەلی، بەرپرسی سەندیکای عەلوەی سلێمانی، بە تۆڕی میدیایی رووداوی گوت: "بەرهەمی بەهارە تەنیا کەنگر لە عەلوە هەیە و کیلۆی بە 3 هەزار دینارە".
لە بازاڕی سلێمانی، هەڵووژە کیلۆی بە 125 دۆلار دەفرۆشرێت. سەروەر عەلی گوتی: "کەسێک 20 کیلۆی لە تورکیاوە هێناوە و تێچووی هاوردەکەی زۆر بووە، ئەگینا لە تورکیاش هێندە گران نییە".
رەجەب حاجی عەزیز، سەرۆکی ئەنجوومەنی عەلوەی هەولێر، بە رووداوی گوت: "بەرهەمی بەهارەی نێوخۆ پێگەییوە، بەڵام هێندە کەمە ناهێندرێتە عەلوە و راستەوخۆ دەبرێتە بازاڕەکان بۆ فرۆشتن".
سەرۆکی ئەنجوومەنی عەلوەی هەولێر ئاماژەی بەوە کرد، هەڵووژەی خۆماڵی تاوەکو ئێستا پێنەگەیشتووە، ئەوەی لە بازاڕەکاندا هەیە لە تورکیاوە هاوردە دەکرێت.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ