رووداو دیجیتاڵ
نوێنەری قەزای خوورماتوو لە ئەنجوومەنی پارێزگای سەلاحەدین رایگەیاند، ئەنجامدەری تەقینەوەکەی نێو بازاڕی خورماتوو، دەستگیرکرا.
کاژێر 10:15ـی شەوی 15-6-2024 بۆمبێکی دەنگی لەنێو بازاڕی خورماتوو تەقییەوە. ئەوکات پۆلیسی خورماتوو بڵاویکردەوە، بۆمبەکە لەنێو بازاڕی گەورە کە زیاتر تورکمانی شیعەن، لەنێو تەنەکەیەکی خۆڵدا تەقیوەتەوە، بەهۆی کاریگەریی دەنگەکەی، جامی دووکانەکانی دەوروبەری شکاون و دوو کەس بەهۆی بەرکەوتنی پارچە شووشەکان برینداربوون.
یاسین داودی، ئەندامی ئەنجوومەنی پارێزگای سەلاحەدین و نوێنەری قەزای خوورماتوو لە ئەنجوومەنەکە، رۆژی شەممە 22-06-2024 بە رووداوی گوت، دوای لێکۆڵینەوەی چڕ و سەیرکردنی کامێراکانی چاودێری، دەزگا ئەمنییەکان ئەنجامدەری تەقینەوەکەیان دۆزییەوە.
یاسین داودی گوتی، شەوی رابردوو هێزەکانی هەواڵگری و ئاسایشی نیشتمانی عێراق لە ناحیەی سلێمان بەگ، گەنجێکیان دەستگیرکردووە، کە ئەنجامدەری تەقینەوەکە بووە. دانی بەوەداناوە کارەکەی کردووە و بەمدواییانەش پەیوەندی بە داعشەوە کردووە
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ