رووداو دیجیتاڵ
دوای ئەوەی بەهۆی ئاڵۆزییەکانی سلێمانی و پێکدادانی هێزە ئەمنییەکان و پاسەوانانی لاهوور شێخ جەنگی بازگەکانی هاتن و چوون بۆ شارەکە ئاستەنگییان بۆ دروستبوو، دۆخەکە ئاسایی بووەتەوە.
ئەفسەرێکی باڵای هێزە ئەمنییەکانی سلێمانی بە تۆڕی میدیایی رووداوی گوت: "هاتن بۆ سلێمانی و دەرچوون لێی لە هەموو بازگەکانەوە ئاسایی بووەتەوە".
دوێنێ لە بازگەکانی سلێمانی - عەربەت، سلێمانی - شارباژێڕ، سلێمانی - دووکان و سلێمانی و کەرکووک ئاستەنگی هاتووچۆ دروستبوو و هەزاران ئۆتۆمبێل چەند کاژێرێک لە شەقامەکان مانەوە.
بەگوێرەی هێزە ئەمنییەکانی سلێمانی، "ئێستا هیچ گرفتێک نەماوە و دۆخەکە تەواو ئاساییە".
بەرەبەیانی ئەمڕۆ 22ـی ئاب، هێزە ئەمنییەکانی یەکێتیی نیشتمانیی کوردستان بۆ دەستگیرکردنی لاهوور شێخ جەنگی هێرشیان کردەسەر هۆتێل لالەزار لە سلێمانی، دوای زیاتر لە سێ کاژێر رووبەڕووبوونەوە ناوبراو و براکانیان دەستگیرکرد.
لە پێکدادانەکانی بەرەبەیانی ئەمڕۆدا چوار کەس کوژران. سێیان کارمەندی هێزە ئەمنییەکانن و یەکێکیان پاسەوانی لاهوور شێخ جەنگی بوو.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ