رووداو دیجیتاڵ
سەرۆک بارزانی و نووری مالیکی، سەرۆکی هاوپەیمانیی دەوڵەتی یاسا کۆبوونەوە. بەگوێرەی راگەیێندراوی نووسینگەی نووری مالیکی، لە کۆبوونەوەکەدا گفتوگۆ لەبارەی دۆخی سیاسی و ئەنجامی دیالۆگە بەردەوامەکانی نێوان لایەنەکان کراوە.
ئەمڕۆ شەممە، نووسینگەی راگەیاندنی نووری مالیکی، سەرۆکی هاوپەیمانیی دەوڵەتی یاسا رایگەیاند، "لە سەرەتای کۆبوونەوەکەدا هەردوولا پیرۆزبایی سەرکەوتنی هەڵبژاردنەکان و تەواوکردنی پابەندبوونە دەستوورییەکەیان لە یەکدی کرد؛ هەروەها گفتوگۆ لەبارەی دۆخی سیاسی و ئەنجامی دیالۆگە بەردەوامەکانی نێوان هێزە نیشتمانییەکان کرا."
بەگوێرەی راگەیێندراوەکە، سەرۆکی هاوپەیمانیی دەوڵەتی یاسا "ئاماژەی بە گرنگیی بەردەوامیی هەوڵە هاوبەشەکان کرد بۆ پەلەکردن لە پێکهێنانی حکومەت بۆ جێبەجێکردنی خواستەکانی گەلی عێراق و بەهێزکردنی سەقامگیری و پاراستنی رێڕۆی دیموکراسی."
دوێنێ، هیشام روکابی، راوێژکاری نووری مالیکی بە تۆڕی میدیایی رووداوی راگەیاند، "ئامانج لە سەردانەکە گفتوگۆکردنە لەسەر هەنگاوەکانی پێکهێنانی کابینەی نوێی حکومەتی عێراق. چاوەڕوان دەکرێت لە چوارچێوەی ئەو پرسەدا باس لە سەرۆکایەتییەکانی پەرلەمان، کۆمار و سەرۆکوەزیران بکرێت."
شەوی 17ی تشرینی دووەمی 2025 چوارچێوەی هاوئاهەنگی کۆبووەوە و گەورەترین فراکسیۆنی لە پەرلەمان راگەیاند. چوارچێوەی هاوئاهەنگی بڕیاری پێکهێنانی دوو لیژنەیشی دا. یەکەم، بۆ دەستنیشانکردنی بەربژێری پۆستی سەرۆکوەزیران. دووەم، بۆ دانوستاندن لەگەڵ لایەنەکان بۆ پێکهێنانی حکومەت.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ