رووداو دیجیتاڵ
وەزارەتی بەرگریی تورکیا کوژرانی سەربازێکی وڵاتەکەی لە هەرێمی کوردستان راگەیاند. هەپەگەش دەڵێت، سوپای تورکیا لە ماوەی دوو رۆژدا لە هێرشەکانیاندا 32 جار چەکی کیمیایی و قەدەخەکراوی بەکارهێناوە.
وەزارەتەکە ئێوارەی چوارشەممە، 22ـی ئایار رایگەیاند، ڤەدات زۆربا، سەربازی پیادەی گرێبەست لە ناوچەی ئۆپەراسیۆنی چنگ-قوفڵ لە هەرێمی کوردستان بۆمبێکی چێندراوی پێدا تەقیوەتەوە کە پێشتر لەلایەن گەریلاکانی پەکەکە دانراوە و بەو هۆیەوە بە سەختی بریندار بووە. دوای ئەوەی گوازراوەتەوە بۆ نەخۆشخانە، گیانی لەدەستداوە.
لەلایەکی دیکەوە ناوەندی راگەیاندنی هێزەکانی پاراستنی گەل-هەپەگە کە باڵی سەربازیی پەکەکەیە، لە دوایین راگەیێندراویدا کە دوێنێ چوارشەممە بڵاویکردووەتەوە، دەڵێت، سوپای تورکیا لە رۆژی 20 بۆ 21ـی ئایار لە هێرشەکانیدا بۆ سەر گەریلاکانیان لە ناوچەکانی زاپ، مەتین و خواکورک 32 جار چەکی کیمیایی و قەدەخەکراوی بەکارهێناوە و فڕۆکەی جەنگی و تۆپخانەکانیان بە شێوەیەکی بەردەوام بۆردوومان و تۆپبارانی ئەو ناوچانەیان کردووە.
ئەم شەڕ و پێکدادانە لە چوارچێوەی ئۆپەراسیۆنێکدایە تورکیا ناوی ناوە چنگ- قوفڵ کە بەرەبەیانی رۆژی 18ـی نیسانی 2022 لە ناوچەکانی ئاڤاشین، مەتین و زاپ لە خاکی هەرێمی کوردستان بۆ سەر پێگەکانی پەکەکە دەستیپێکرد و تائێستا بەردەوامە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ