سامان بەرزنجی: مووچەی وەزارەتی تەندروستی ئامادەیە

رووداو - هەولێر

سامان بەرزنجی، وەزیری تەندروستیی حکومەتی هەرێمی کوردستان لە کۆنگرەیەکی رۆژنامەڤانیدا رایگەیاند، مووچەی وەزارەتی تەندروستی ئامادەیە و وەزارەتەکەیان یەکەم وەزارەت دەبێت بۆ وەرگرتنی مووچە.

سەبارەت بە کاتی دابەشکردنی مووچەش، وەزیری تەندروستی گوتی کە "سبەی یاخود دوو سبەی دەبێت".

بە گوتەی سامان بەرزنجی، بڕی مووچەی پێویست بۆ وەزارەتی تەندروستی ئامادەیە و لە خەزێنەی پارێزگا و ئیدارەکان دانراوە.

وەزیری تەندروستی ئاماژەی بەوە دا، یەکەمین وەزارەت لە وەرگرتنی مووچە وەزارەتی تەندروستی دەبێت و هیوایشی خواست کە ئەو کارمەندانەی تەندروستی بگەڕێنەوە سەر کارەکانیان کە مانیان گرتووە.

رۆژی 21ی حوزەیرانی 2020 حکومەتی هەرێمی کوردستان چەند بڕیارێکی لەبارەی مووچە و دەرماڵەی فەرمانبەران و مووچەخۆران دەرکرد.

 

لە بڕیارەکانی ئەنجوومەنی وەزیراندا هاتووە، بڕیار دراوە بە خەرجکردنی 79%ی مووچە و دەرماڵە، ئەو کەسانەش کە مووچەکەیان لە 300 هەزار کەمترە، کەمکردنەوەی مووچە نایانگرێتەوە؛ بڕیارەکانیش "کاتی دەبن" و تەنیا بۆ مووچەی ئەم مانگەیە.