رووداو دیجیتاڵ
بەرەبەیانی ئەمڕۆ رووداوێکی هاتووچۆ لەنێوان دوو ئۆتۆمبێل لەسەر رێگەی سنە-دیواندەرە روویدا و بەهۆیەوە پێنج کەس گیانیان لەدەستدا و کەسێکیش بریندار بوو.
رووداوەکە لە نزیک سێڕێیانی گوندی سەراو قامیشی سنە بووە کە دەکەوێتە ناوچەی سارال و 15 کیلۆمەتر لە ناوەندی شاری سنەوە دوورە.
عیسا گەوهەری، بەڕێوەبەری پۆلیسی رێگەوبانی پارێزگای سنە رایگەیاند، "کاژێر 06:00ـی بەرەبەیانی ئەمڕۆ هەینی دوو ئۆتۆمبێلی تایبەت لە جۆری پەیکان و سایپا لەسەر رێگەی نێوان شارەکانی سنە-دیواندەرە و لە نزیک سێرێیانی گوندی سەراو قامیش پێکیانداداوە و لە ئەنجامدا ئۆتۆمبێلی جۆری پەیکان گڕی گرتووە."
بە گوتەی عیسا گەوهەری، "لە رووداوەکەدا پێنج کەس گیانیان لەدەستداوە کە هەموویان سەرنشینی ئۆتۆمبێلە پەیکانەکەن و کەسێکیش بریندار بووە."
سەبارەت بە هۆکاری رووداوەکەش، بەڕێوەبەری پۆلیسی رێگەوبانی پارێزگای سنە دەڵێت، بەپێی لێکۆڵینەوە سەرەتاییەکان شۆفێری ئۆتۆمبێلی جۆری سایپا خەوی لێکەوتووە، بۆیە ئۆتۆمبێلەکە لە رێڕەوی خۆی دەرچووە و خۆی بە ئۆتۆمبێلەکەی دیکەدا کێشاوە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ