کوردستان
د. ئەحمەد کەرکووکی، بەربژێری دەرچووی یەکێتی نیشتمانی کوردستان بۆ ئەنجوومەنی پارێزگای کەرکووک.
رووداو دیجیتاڵ
بەربژێرێکی دەرچوووی یەکێتی نیشتمانی کوردستان بۆ ئەنجوومەنی پارێزگای کەرکووک دەڵێت، هەوڵی تیرۆرکردنی دراوە و فەرماندەیی پۆلیسی کەرکووکیش رەتیدەکاتەوە.
شەوی رابردوو، د. ئەحمەد کەرکووکی، بەربژێری دەرچووی یەکێتی نیشتمانی کوردستان بۆ ئەنجوومەنی پارێزگای کەرکووک لە پەڕەی فەیسبووکی خۆی بڵاویکردەوە، لە شاری کەرکووک هەوڵی تیرۆرکردنی دراوە و لەگەڵ ژمارەیەک هاوڕێی بووە و گولـلە بەر ئۆتۆمبێڵی هاوڕێییەکی کەوتووە و جامەکەی شکاوە، بەڵام خۆی و هاوڕێکانی سەلامەتن.
لەوبارەوە فەرماندەیی پۆلیسی پارێزگای کەرکووک درەنگانێکی شەوی رابردوو لە روونکردنەوەیەکدا هەواڵەکەی رەتکردەوە و رایگەیاند، "لە بەشێک لە تۆڕە کۆمەڵایەتییەکاندا هەواڵێک بڵاوکراوەتەوە کە هەوڵی تیرۆرکردنی بەربژێرێکی دەرچوو دراوە بۆ ئەنجوومەنی پارێزگای کەرکووک، ئەم هەواڵە راست نییە و بەم شێوەیە نییە کە باسکراوە، بەڵکو ئۆتۆمبێلێکی هاوڕێکەی گولــلەی بەرکەوتووە و ئەوکات هیچ کەسێک لە نێو ئۆتۆمبێلەکەدا نەبووە".
فەرماندەیی پۆلیسی کەرکووک داوادەکات "هەواڵی ناڕاست بڵاونەکرێتەوە، تا لە سەرچاوەی هەواڵەکە دڵنیا نەبنەوە".
د. ئەحمەد کەرکووکی لە لێدوانێکیدا بۆ میدیای حیزبەکەی دەڵێت، "وادیارە وایانزانیوە من لەنێو ئەو ئۆتۆمبێلەدام، بەڵام من دوور بووم. لایەنی پەیوەندیدارمان ئاگادارکردووەتەوە و ئەوان لێکۆڵینەوە دەکەن".
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ