رووداو دیجیتاڵ
بەڕێوەبەرایەتیی رێگەوبان و گواستنەوەی پارێزگای ئیلام رایدەگەیێنێت، لە ماوەی نۆ مانگدا زیاتر لە حەوت ملیۆن گەشتیار و زیارەتکار لە رێگەی دەروازەی مێهرانەوە هاتووچۆیان کردووە؛ دەشڵێت، نزیکەی شەش ملیۆن لەو گەشتیارانە هاووڵاتیی ئێرانی بوون.
حەیدەر دەشتیپوور، بەڕێوەبەری گشتیی رێگەوبان و گواستنەوەی پارێزگای ئیلام، رۆژی دووشەممە بە میدیای فەرمیی وڵاتەکەی راگەیاند، لە 21-03-2025ـەوە تاوەکو 21-12-2025، واتە لە ماوەی نۆ مانگی رابردوودا، حەوت ملیۆن و 40 هەزار کەس لە رێگەی دەروازەی نێودەوڵەتیی مێهرانەوە هاتووچۆیان کردووە.
بەگوێرەی ئامارەکە، پشکی شێر بەر گەشتیار و زیارەتکارانی ئێرانی دەکەوێت کە ژمارەیان پێنج ملیۆن و 744 هەزار کەس بووە.
حەیدەر دەشتیپوور ئاماژەی بەوە کرد، لەو ژمارە زۆرەی ئێرانییەکان؛ سێ ملیۆن و 11 هەزار و 771 کەس لە عێراقەوە گەڕاونەتەوە بۆ ئێران و دوو ملیۆن و 762 هەزار و 340 کەسیش لە ئێرانەوە چوونەتە نێو عێراق.
سەبارەت بە هاووڵاتییانی بیانیش، بەڕێوەبەری گشتیی رێگەوبان و گواستنەوەی ئیلام گوتی: "لەو ماوەیەدا یەک ملیۆن و 296 هەزار گەشتیاری بیانی لە مێهرانەوە هاتووچۆیان کردووە."
بە گوتەی بەرپرسانی پارێزگاکە، لە رۆژانی ئاساییدا بەتێکڕا 10 هەزار گەشتیار و زیارەتکار لە مێهرانەوە دەپەڕنەوە، بەڵام لە بۆنە ئاینی و مەزهەبییەکاندا ژمارەکە زۆر زیاتر هەڵدەکشێت.
دەروازەی مێهران بەهۆی نزیکیی لە شارە پیرۆزەکانی شیعەکان لە عێراق، بە یەکێک لە قەرەباڵخترین دەروازەکانی نێوان ئێران و عێراق دادەنرێت. دووریی نێوان دەروازەکە و شاری کەربەلا 280 کیلۆمەترە و مەودای نێوانی لەگەڵ شاری نەجەف کەمتر لە 320 کیلۆمەترە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ