رووداو دیجیتاڵ
سەرۆکی کۆمەڵەی پەنابەرانی رۆژئاوای کوردستان دەڵێت، نزیکەی 260 هەزار هاونیشتمانیی خەڵکی رۆژئاوا و هاووڵاتیی خەڵکی سووریا لە هەرێمی کوردستان دەژین، کە 245 هەزاریان هاونیشتمانین. ئاماژە بەوەش دەکات، عێراق و نەتەوە یەکگرتووەکان بۆ گەڕانەوەیان هاوکار نین.
ئەمڕۆ هەینی 24-01-2025 هۆزان عەفرینی، سەرۆکی کۆمەڵەی پەنابەرانی رۆژئاوای کوردستان لەکاتی بەشداریکردنی لە بووڵتەنی کاژێر 11:00ی تۆڕی میدیایی رووداو، کە هێڤیدار زانا پێشکێشی کرد، رایگەیاند، "نزیکەی 260 هەزار پەنابەری خەڵکی سووریا و رۆژئاوای کوردستان لە هەرێمی کوردستان دەژین."
سەرۆکی کۆمەڵەی پەنابەرانی رۆژئاوای کوردستان گوتیشی، لەو ژمارەیە زیاتر لە 200 هەزاریان لە هەولێر و دهۆکن و 60 هەزاریان لە سلێمانی و هەڵەبجە دەمێننەوە.
هۆزان عەفرینی ئاماژەی بەوەش کرد، 245 هەزاریان کوردن و 15 هەزاریان عەرەب، تورکمان، ئاشووری و ئەرمەنین.
بە گوتەی سەرۆکی کۆمەڵەی پەنابەرانی رۆژئاوای کوردستان، دۆخی ئەو هاونیشتمانی و هاووڵاتییانە باش نییە و لە ساڵی 2019وە نەتەوە یەکگرتووەکان دەستی لە هاوکاریکردنیان هەڵگرتووە.
هۆزان عەفرینی ئەوەشی خستەڕوو، بۆ گەڕانەوەی هاونیشتمانی و هاووڵاتییەکان بۆ رۆژئاوای کوردستان و سووریا، حکومەتی عێراق و نەتەوە یەکگرتووەکان هیچ هاوکارییەکی نەکردووە، "لە هەر وڵاتێک بۆ گەڕاندنەوەی پەنابەران بودجەیەک دەستنیشان دەکرێت، بۆئەوەی بگەڕێنەوە وڵاتی خۆیان، بەڵام تاوەکو ئێستا لە عێراق ئەمە نەکراوە."
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ