رووداو دیجیتاڵ
مینی پاسێک لە دەشتی زرارەتی لە پارێزگای هەولێر گڕی گرت. شوفێری ئۆتۆمبێلەکە دەڵێت، قوتابی تێدا بووە و هەموویان سەلامەتن.
رووداوەکە رۆژی شەممە، 24-05-2025، لە دەشتی زرارەتی لە پارێزگای هەولێر لەنێوان گوندەکانی زەرگەزەوی و چڕە روویدا.
نیعمەت شاکر، شۆفێری مینی پاسەکە کە خۆیشی قوتابیی 12ـی ئامادەییە، قسەی بۆ رەنجە جەمال، پەیامنێری تۆڕی میدیایی رووداو کرد و گوتی: ''بەرەو قوتابخانە دەڕۆیشتین بۆ تاقیکردنەوە، لەناکاو دەنگێکی بەرزمان بیست. کاتێک دەرگەم کردەوە، ئۆتۆمبێلەکە گڕی گرتبوو.''
بەگوتەی نیعمەت شاکر، دوای گڕگرتنی ئۆتۆمبێلەکە، ئەو دەرگەیەی سەرنشینەکان پێیدا سەردەکەون، داخرا؛ ئاماژەی بەوەشکرد: ''چوومە خوارەوە و ناچار قوتابیانیش بە جامەکاندا خۆیان فڕێدایە دەرەوە.''
وەک ئەو شۆفێرە دەڵێت: ''سێ خولەکی نەبرد، مینی پاسەکەم کە نرخەکەی نزیکەی 10 هەزار دۆلار بوو، بە تەواوی سووتا.''
تاوەکو ئێستا هۆکاری گڕگرتنی ئۆتۆمبێلەکە دیار نییە. نیعمەت شاکر باسی لەوەکرد، رووداوەکە هیچ زیانێکی گیانی نەبووە و قوتابییان سەلامەتن.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ