رووداو دیجیتاڵ
بەڕێوەبەری کشتوکاڵی خانەقین دەڵێت، لە ساڵی 2007ـەوە زیاتر لە 130 جار باخەکانی سنووری قەزاکە سووتاون. ئاماژە بەوەش دەکات، ئێستا رێژەی سەوزایی لە خانەقین سەروو 13%یە.
ئەمڕۆ یەکشەممە 24-08-2025 کامەران عەبدوڵڵا، بەڕێوەبەری کشتوکاڵی خانەقین قسەی بۆ هونەر حەمید، پەیامنێری تۆڕی میدیایی رووداو کرد و رایگەیاند، بەر لە ساڵی 2003 رووبەری سەوزایی بەراورد بە رووبەری نیشتەجێبوون لە شارەکە زۆر زیاتر بوو، بەڵام ئێستا پێچەوانە بووەتەوە.
بە گوتەی کامەران عەبدوڵڵا، زیاتر لە دوو هەزار و 400 دۆنم باخ لە خانەقین هەیە، کە بەشێکی لە ساڵی 2007ـەوە لانیکەم 130 جار سووتاوە، ''باخ هەیە 2 بۆ 3 جار سووتاوە؛ باخی وا هەیە دوو دۆنمی سووتاوە و سەوز نەکراوەتەوە، ئەوەش کاریگەری لەسەر رێژەی سەوزایی هەبووە.''
وەک بەڕێوەبەری کشتوکاڵی خانەقین دەڵێت، بەشێک لە باخەکان بە ئەنقەست سووتێنراون و رایگەیاند: ''کاتی خۆی داوامان لە دادگە کرد رێکاری یاسایی بەرامبەر ئەو خاوەن باخانە بگرێتەبەر کە بەئەنقەست باخەکانیان دەسووتێنن.''
کامەران عەبدوڵڵا رایگەیاند، ئێستا رێژەی سەوزایی لە خانەقین دەگاتە سەروو 13%.
رێژەی سەوزایی سەنتەری پارێزگاکانی باشووری کوردستان لە هیچ ناوچەیەک بەپێی رووبەر ناگاتە 20% کە ستانداردێکی جیهانییە.
بەگوێرەی بەرپرسانی شارەوانییەکان بۆ رووداو، زۆرترین رێژەی سەوزایی بەگوێرەی رووبەر لە هەولێرە؛ دواتر سلێمانی، هەڵەبجە، دهۆک و کەرکووک.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ