دیمەنێکی ئاگرەکە دوای رووداوە هاتووچۆکە
رووداو دیجیتاڵ
لە رێگەی بەردەڕەش - کەڵەک رووداوێکی هاتووچۆ روویدا و بەو هۆیەوە ئاگرێکی گەورە کەوتەوە. گوتەبێژی بەرگریی شارستانیی هەولێر دەڵێت، تەرمێکیان لە یەکێک لە ئۆتۆمبێلەکاندا دەرهێناوە.
ئەمڕۆ هەینی، 24-11-2023، موقەدەم کاروان میراودەلی، گوتەبێژی بەرگریی شارستانیی پارێزگای هەولێر بە تۆڕی میدیایی رووداوی گوت، ئاگرەکە لە سنووری پارێزگای دهۆکە، بەڵام لە قەزای خەبات لە پارێزگای هەولێر نزیکترە و تیمەکانیان رەوانەی شوێنی رووداوەکە کردووە بۆ کۆنترۆڵکردنی.
ئاگرێکی گەورە لەسەر رێگەی بەردەڕەش - خەبات؛ هاونیشتمانییەک ڤیدیۆکەی بۆ رووداو ناردووە و دەڵێت، دوو تەنکەر پێکیان داداوە pic.twitter.com/E0JCFhdVJG
— Rudaw (@Rudawkurdish) November 24, 2023
میراودەلی گوتی، بارهەڵگرەکان سووتەمەنیی نەفتایان پێ بووە؛ بۆیە ئاگرەکەی گەورە بووە. گوتیشی، پێنج ئۆتۆمبێلی ئاگرکوژێنەوە سەرقاڵی کۆنترۆڵکردنی ئاگرەکەن و 90%ی ئاگرەکەیان کوژاندووەتەوە.
لەبارەی زیانەکانەوە، گوتەبێژی بەرگریی شارستانیی هەولێر گوتی، "تەرمی کەسێکیان لە یەکێک لە ئۆتۆمبێلەکاندا دەرهێناوە و سەرقاڵی گەڕانن بۆ زانینی تەواوی زیانەکان".
رێگەی بەردەڕەش - کەڵەک لە سنووری پارێزگای دهۆک رێگەیەکی یەک سایدە و دەروازەی ئیبراهیم خەلیل بە هەولێر دەبەستێتەوە. رۆژانە سەدان بارهەڵگر و ئۆتۆمبێلی تایبەت بە رێگەکەدا هاتووچۆ دەکەن.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ