رووداو دیجیتاڵ
دوای پێکهێنانی 'ئەنجوومەنی نیشتمانیی سوننەکان'، ئێستا چاوەکان لەسەر کوردن بۆ پێکهێنانی ئەنجوومەن و چوونی بۆ بەغدا بە یەکدەنگی. پارتی و یەکێتی مکوڕن لەسەر ئەوەی هەمووان لەسەر پرسە نەتەوەییەکان یەکدەنگن، بەڵام تاوەکو ئێستا نەیانتوانیوە لەبارەی مامەڵەکردن لە بەغدا کۆببنەوە. سیاسەتڤانێکیش دەڵێت: "ئەم ئەنجوومەنەی سوننەکان، ئاڵنگارییەکی سیاسی و ئەخلاقیی نوێیە بۆ عەقڵی سەرکردایەتیی کورد."
دوێنێ یەکشەممە، دەستپێخەرییەکى خەمیس خەنجەر، سەرۆکى هاوپەیمانیى سەروەرى، سەرکردەى چوار لە لیستە براوەکانى دیکەى سوننەى لە ماڵەکەى لە بەغدا کۆکردەوە بۆ پێکهێنانى ئەجوومەنێک کە بە گوتەى خۆیان "بۆ یەکڕیزى و بەرگریکردن لە مافى پارێزگاکانیان و شێوازى بەشداریکردن و رۆڵ بینینیانە لە حکومەتى داهاتووى عێراق."
بە گوێرەى راگەیێنراوى کۆتایی کۆبوونەوەى ئەو پێنج لایەنە، رێککەوتوون ئەنجوومەنى سیاسیی نیشتمانى بۆ خۆیان پێکبهێنن، کە بۆ قۆناخى چوار ساڵى داهاتووى خولی شەشەمى پەرلەمان دەبێت.
شیعە و سوننە سەکۆی بڕیاریان هەیە و کورد پەرتەوازەیە
هێزە شیعییەکان، کە 179 کورسیی پەرلەمانیان لە خولی شەشەمدا مسۆگەر کردووە، سەکۆی بڕیاریان لە کۆبوونەوەکانی چوارچێوەی هاوئاهەنگییە کە سەرۆک و سەرکردەکانیان لەچواردەوری مێزێکی بازنەییدا کۆدەبنەوە.
سوننەش بە 73 کورسی، وەکو پێکهاتەی دووەمی عێراق، ئەنجوومەنی سیاسییان پێکهێناوە و دوا بڕیار ئەو ئەنجوومەنە دەیدات، بەڵام کورد کە زیاتر لە 60 کورسی هەیە و لەدوای سوننەوە دێت، تاوەکو ئێستا براوەکانی کورسیی پەرلەمان کۆنەبوونەتەوە و یەکدەنگ نین.
پارتی: یەکێتی بەدەم داوای یەکڕیزییەوە نەهات
شاخەوان عەبدوڵڵا، لە خولی پێنجەمی پەرلەماندا، باڵاترین پۆستی لە بەرکەوتەی کورد لە پشکی پارتی دیموکراتی کوردستان وەرگرتبوو، کە جێگری دووەمی سەرۆکی پەرلەمان بوو، جگە لەوەش، ئەندامی کۆمیتەی ناوەندییە.
ئەمڕۆ دووشەممە، شاخەوان عەبدوڵڵا بە رووداوی راگەیاند، "ئێمە وەکو پارتی، پێش هەڵبژاردن داوای یەک لیستیمان کرد، بەڵام قبووڵیان نەکرد، دواتر داوامان کرد لە ناوچە کوردستانییەکانی دەرەوەی ئیدارەی هەرێم یەک لیست بین، ئەویش قبووڵ نەکرا، تەنانەت داوامان کرد لە خانەقین یەک لیست بین، دیسان ئەوەش لەلایەن یەکێتییەوە قبووڵ نەکرا."
شاخەوان عەبدوڵڵا دەڵێت: "پرسی خاک، مادەی 140 و یاسای نەوت و گاز کە مافی هاونیشتمانییانە، دەبێ لە بەغدا یەکلایی بکرێتەوە، هیچ حیزبێکی کوردستانیش دژی ئەمانە نییە."
راوێژکارێکی بافڵ تاڵەبانی: یەکێتی لە بەغدا شەڕی نەتەوەیی دەکات نەک حیزبی
بێستوون فایەق، راوێژکاری بافڵ تاڵەبانی، سەرۆکی یەکێتیی نیشتمانیی کوردستانە. لەوبارەوە قسەی بۆ تۆڕی میدیایی رووداو کرد و گوتی: "دۆخی عێراق جیایە لە هەرێمی کوردستان، باشترە لە رۆشتن بۆ بەغدا، گرنگیی بە پرسی نەتەوەیی بدەن و یەکێتیش ئەمەی بەلاوە گرنگترە."
بێستوون فایەق گوتیشی: "شەڕی یەکێتی لە بەغدا، نەتەوەییە نەک حیزبی. سەرۆک بافڵ چەندجارێک چووەتە بەغدا بۆ پرسی نەتەوەیی، بۆیە تێڕوانینی یەکێتی لە بەغدا نەتەوەییە و خۆی بە خاوەنی کۆمەڵێک دۆسیەی نەتەوەیی دەزانێت؛ وەکو خاک، مادەی 140، مووچە و پێشمەرگە و هتد.."
شاخەوان عەبدوڵڵا: بە پەرتەوازەیی زۆر شت لەدەست دەدەین
هەرچەندە هەموو حیزبە کوردستانییەکان، لە سەرووی هەمووشیانەوە پارتی و یەکێتی، پێداگرن لەسەر یەکدەنگیی کورد لە بەغدا، بەڵام کەتوار (ئەرزی واقیع) بە جۆرێکی دیکەیە و تاوەکو ئێستا تەنانەت کۆبوونەوەشیان نەکردووە.
شاخەوان عەبدوڵلا ئەندامی کۆمیتەی ناوەندیی پارتی، نایشارێتەوە کە بەمجۆرە کورد بچێتە بەغدا، "زۆر شت لەدەست دەدات" و دەشڵێت: "هەم بەرکەوتەی هەڵبژاردن لەدەست دەدەین و هەمیش لاواز دەبین."
"یەکگرتنی کورد لە هەموو لایەنە عێراقییەکان ئاسانترە"
ئەو ئەندامەی کۆمیتەی ناوەندیی پارتی، سەرەڕای بوونی ناکۆکی دەڵێت: "هێشتا درەنگ نەبووە بۆ داواکردنی مافە دەستوورییەکان، ئەوەی داوا دەکرێ، ئیمتیازاتی شەخسی نییە، پرسی خاک و مادەی 140 و نەوت و گازە کە مافی هاونیشتمانییانە."
شاخەوان عەبدوڵلا دەڵێت: "هیچ حیزبێکی کوردستانی دژی مافە دەستوورییەکان نییە، بۆیە یەکگرتنی کورد لە هەموو لایەنە عێراقییەکانی دیکە ئاسانترە و دەبێ هەوڵبدرێ ئەمە زیاتر دوانەخرێ."
بە گوتەی جێگری دووەمی سەرۆکی پەرلەمانی عێراق لە خولی پێنجەم، "یەک کورسیش بۆ پارتی گرنگە و سەردانی ئەو حیزبانەش دەکەین کە یەک کورسییان هەیە."
بێستوون فایەقیش ئاماژە بەوە دەکات، "باشترە پێش دەستپێکردنی خولی شەشەم بە ئاگایی هەنگاوبنێین و لەبەغدا لێک نزیک بین."
"تەحەدایەکی ئەخلاقی وسیاسی دیکە بۆ عەقڵی سەرکردایەتیی کورد"
ئەبوبەکر کاروانی، پێشتر ئەندامی مەکتەبی سیاسیی یەکگرتوو بووە و لە کۆنگرەی هەشتەمدا خۆی بۆ پۆستی ئەمینداری گشتی بەربژێر کردبوو، بەڵام ئێستا وەکو سیاسەتڤانێکی بێلایەن لەبارەی دۆخی سیاسیی کوردستان و عێراقەوە قسە دەکات.
کاروانی بە رووداوی راگەیاند، ئەنجوومەنی نیشتیمانی سوننەکان جگە لەوەی وێنای پێکهاتە بۆ سوننەکان دەگێرێتەوە (ئەگەر بە کاتیش بێت)، پێگەیان لەگفتوگۆکانی پێکهێنانی حکومەت بەهێزدەکات بە حوکمی نوێنەرایەتی و بەرنامە و گفتوگۆی هاوبەش.
بە گوتەی ئەبوبەکر کاروانی، "پێکهێنانی ئەم ئەنجوومەنە (ئەنجوومەنی سیاسیی سوننەکان) تەحەدایەکی سیاسی وئەخلاقیی نوێیە بۆ عەقڵی سەرکردایەتیی کورد، کە لە پەیوەندی لەگەڵ گەل و نیشتیمان و بیناکردنەوە و تێکەڵکردنی توانا نیشتیمانییەکان و زاڵبوون بەسەر ن
اکۆکی و دابەشبوونە خێڵایەتییە سیاسییە خوار نەتەوەییەکاندا، لەژێر پرسیاری جیدیدایە."
کاروان دەشڵێت: "ناکرێت ئەم عەقڵە بەنیمچە بەردەوامی لەبازنەیەکی نیمچە داخراودا بسوورێتەوە و توانای برینی قۆناخی نەبێت، مێژوو بەرهەم بێنێتەوە و بۆ ئاستی خەمە نیشتیمانییە گەورەکان بەرز نەبێتەوە و لە بەرهەمهێنانی سازان وهاوکۆیی نیشتیمانی بەوجۆرە دەستەوەستان وناکارا بێت."
ئەو سیاسەتڤانە، باسی پەیوەندییەکانی پارتی و یەکێتی دەکات و دەڵێت: "ئەوەی ئێستا لەنێوان پارتی ویەکێتیدا دەگوزەرێت، دژ بە ئەرکە نیشتیمانییە هاوبەشەکانە، دژی بەرژەوەنییە باڵاکانی گەلی کوردستان و ناسیۆنالیزمی کوردی و پێداویستی وپێشمەرجەکانی بەرگریکردنە لە ماف ودەستکەوتەکان، دژی خۆئامادەکردنە بۆ گۆرانکارییە چاوەروانکراوەکان و ئەو دەرفەت ومەترسییانەی لەگەڵ خۆیان سەبارەت بە ئێمە هەڵی دەگرن."
کاروانی زیاتر دەڵێت: "ئەمەی دەگوزەرێت و روودەدات نائاساییە، خەمساردی بەرامبەر گەورەیی دەرفەت و مەترسییەکانی بەردەم گەلەکەمان و پرسەکەی پێوە دیارە، چونکە کوردی باشوور پێویستی بە چوارچێوەی کاری هاوبەشە، پێویستە هێزو فراکسیۆنەکانی بە بەرنامە و شاندی هاوبەشەوە بچنە ناو گفتۆوگۆکانی پێکهێنانی حکومەتی عێراقەوە."
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ