دیندار زێباری: دۆسیەی لێکۆڵینەوەمان بۆ تاوانەکانی داعش کردووەتەوە

 

رۆژی چوارشەممە، 25-01-2023، دیندار زێباری، رێکخەری راسپاردە نێودەوڵەتییەکانی حکومەتی هەرێمی کوردستان میوانی بوولتەنی کاژێر 17:00ـی تۆڕی میدیایی رووداو بوو کە سیما ئابخێزر پێشکێشی دەکات، رایگەیاند: "حکومەتی هەرێمی کوردستان لایەنێکی گرنگە بۆ پرۆسەی ناساندنی تاوانی داعش دژ بە خەڵکی عێراق و کوردستان و بەتایبەتی خوشک و برایانی ئێزدی. تیمی نێودەوڵەتیی نەتەوە یەکگرتووەکان یونیتاد بەرپرسیارە لە کۆکردنەوەی داتا و زانیارییەکان لەسەر تاوانەکانی داعش لە هەرێمی کوردستان و عێراق و لەم پرۆسەیەدا ئێمەش هاوکاریانین".

 

دیندار زێباری گوتی: "تیمی یونیتاد پرۆسەی دروستکردنی دۆسیەی تایبەت بە لێکۆڵینەوەی لەسەر تاوانەکانی داعش دەستپێکردووە و حکومەتی هەرێمی کوردستان لایەنێکی گرنگە بۆ پێدانی زانیاری و تەنانەت پرۆسەی دادگایی و لێکۆڵینەوە."

 

رێکخەری راسپاردە نێودەوڵەتییەکانی حکومەتی هەرێمی کوردستان دانپێدانانی پەرلەمانی ئەڵمانیا بۆ بەجینۆساید ناساندنی کۆمەڵکوژیی ئێزدییەکان بە هەنگاوێکی گرنگ وەسف دەکات و دەڵێت: "ئەو بڕیارە پاڵپشتییەکی گەورەیە بۆ هەوڵەکانی نەتەوە یەکگرتووەکان و حکومەتی هەرێمی کوردستان و حکومەتی عێراق و دەمانباتە قۆناخێکی نوێ، کە ئەویش قۆناخی دادگاییکردنی تیرۆریستانی داعشە".

 

بە گوتەی دیندار زێباری: "یەکەمجارە لە مێژووی عێراقدا وەزارەتی دەرەوەی عێراق داوای کردووە ئەنجوومەنی ئاسایشی نێودەوڵەتی دۆسیە بۆ تاوانەکانی داعش دروستبکات و داتا و زانیارییان لەسەر کۆبکاتەوە و بتوانێت بە سێ تاوانی نێودەوڵەتی دادگایی تۆمەتباران دەستپێبکات."

 

بۆ دروستکردنی دۆسیەی لێکۆڵینەوە لە تاوانەکانی داعش نزیکەی 220 ستافی نێودەوڵەتی و نێوخۆیی کاردەکەن، کە هەموویان سەر بە نەتەوە یەکگرتووەکانن. دیندار زێباری گوتی، لە هەولێر و دهۆک دوو ئۆفیسیان هەیە و لە بەغداش ئۆفیسێک، ئەرکی سەرەکی ئەو تیمە چاوپێکەوتنە لەگەڵ شاهێدحاڵەکان، تۆماری دەنگی و داتا و زانیاری کۆدەکەنەوە کە لە میدیاکان و کۆمپانیاکانی پەیوەندیکردنەوە کۆکراونەتەوە و بە دۆکۆمێنتیان دەکەن و ئێستا ئەم پرۆسەیە دەستیپێکردووە.

 

رێکخەری راسپاردە نێودەوڵەتییەکانی حکومەتی هەرێمی کوردستان ئاشکرایکرد، "لە هەرێمی کوردستان نزیکەی 85 هەزار بەڵگەی فیزیکییان ئەرشیڤ کردووە و پرۆسەکەش بە هاوکاریی یونیتاد بەردەوامە. لەدوای تاوانەکانی داعش ئەوە یەکەمجارە هەرێمی کوردستان بووەتە خاوەن ئەرشیڤێکی ناوەندی کە لە وەزارەتی ناوخۆ ئەرشیڤدەکرێن و ئامانجیش بەکارهێنانیانە لەکاتی دادگاییکردنی تاوانبارانی داعش".

 

بەگوتەی دیندار زێباری، لە دهۆک پێنج هەزار دۆسیەی لێکۆڵینەوە لە تاوانەکانی داعش کۆکراوەتەوە کە دەستەی جی ئای سی ئی کاری لەسەردەکات و گوتەی دەیان هەزار شاهێدحاڵ وەرگیراوە و حکومەتی ئەڵمانیا لە رێگەی یونیتاد یەک لەو وڵاتانە بووە کە هاوکار بووە لەم پرۆسەیەدا.