کۆنسووڵی ئەڵمانیا لە هەولێر: کار بۆ گەڕانەوەی شکۆمەندانەی ئێزدییەکان دەکەین

 

 

ئالبرێشت فۆن ڤیتکه، کۆنسووڵی گشتیی ئەڵمانیا لە هەولێر ئاماژەی بەوە دا، ئەوان بە چالاکانە پاڵپشتیی هەردوو دەسەڵاتدارانی ناوخۆیی عێراق و هەرێمی کوردستان دەکەن بۆ رەخساندنی هەلومەرجی گونجاو، هەروەها پاڵپشتیی پڕۆژەکانی ئاوەدانکردنەوە و دابینکردنی پێداویستییە سەرەتاییەکان و کەرتی تەندروستی دەکەین.

 

فۆن ڤیتکه جەختی لەوە کردەوە، ئەڵمانیا ناتوانێت ئەمن و ئاسایش و هەلومەرجی ئابووری دابین بکات، بەڵام بەردەوام لەگەڵ حکومەتی عێراق و هەرێمی کوردستان کار دەکەن بۆ پاڵپشتیی گەڕانەوەی ئێزدییەکان.

 

ڤیتکە ئاماژەی بەوەش کرد، وڵاتەکەی بەردەوام کار لەسەر زیندوو هێشتنەوەی پرسی ئێزدییەکان دەکات و هەوڵ دەدات بە هاوکاریی لایەنە پەیوەندیدارەکان، ژیانێکی شایستە بۆ گەڕاوەکان دابین بکات.

 

 

ئەڵمانیا بەگرنگییەوە بیر لەوە دەکاتەوە ژینگەیەکی وا بۆ ئێزدییەکان دروست بکرێت تاوەکو بە سەلامەتی و شکۆمەندانەوە بگەڕێنەوە زێدی رەسەنی خۆیان. ئێمە زۆر چالاکانە کارمان لەسەر کردووە و پاڵپشتیی لە هەردوو دەسەڵاتدارانی نێوخۆیی عێراق و هەرێمی کوردستانی عێراقمان کردووە بۆ رەخساندنی ئەو هەلومەرجە، پاڵپشتیی ئەوەشمان کردووە پڕۆژەگەڵێک هەبن بۆ ئاوەدانکردنەوەی ماڵەکان و دابینکردنی ئاو و پێداویستییە سەرەتاییەکان و کەرتی تەندروستی. تاوەکو هەڵومەرجەکان بۆگەڕانەوەی خەڵک لەباربن، ئەوەش دەڵێم کە ئەڵمانیا ناتوانێت ئەمن و ئاسایش و هەلومەرجە ئابوورییەکان دابین بکات. بەڵام ئێمە زۆر بەگرنگییەوە لە کێشەکە دەڕوانین بە زیندوویی دەیهێڵینەوە و پێکەوەش لەگەڵ حکومەتی عێراق و حکومەتی هەرێمی کوردستانی عێراق  کار دەکەین بۆ پاڵپشتیی گەڕاندنەوەی ئێزدییان.