شکاری پاڵەوانی لەشجوانی
رووداو دیجیتاڵ
شکار، گەنجێکی 25 ساڵی پێنجوێنی، لەوپەڕی بێ هیواییەوە بەهۆی ئۆتیزم و نەخۆشیی جەستەیی، بە یارمەتیی راهێنەرەکەی بووە پاڵەوانی لەشجوانیی کوردستان. ئێستا ئامادەکاری بۆ پارائۆڵۆمپیک دەکات و هێمای هیوا و کۆڵنەدانە، تەنانەت تەندروستیشی باشتر بووە و خەریکە فێری قسەکردن دەبێت.
شکار گەنجێکی تەمەن 25 ساڵانە، لە لەدایکبوونیەوە نەخۆشیی زەردوویی و ئێسکە نەرمە تەنگی پێهەڵچنیبوو، لەگەڵ ئەوەیشدا ئۆتیزمە، بەڵام ئەو سەختیانە نەبوونە رێگر لەبەردەمیدا و بە یارمەتیی راهێنەرەکەی ئێستا یەکێکە لە پاڵەوانەکانی لەشجوانیی کوردستان.
رێکەوت فازڵ، راهینەر دەڵێت، "سەرەتا شکار هات، بە دوو کەس هێنایانە سەرەوە، لەگەڵی بەردەوام بووم تاوەکو ئێستا."
رۆژانە دوو کاژێر و هەفتانە 6 رۆژ راهێنان، لە ماوەی 5 ساڵدا فریادڕەسی شکاری پاڵەوان بوون لە رزگاربوونی لە نەخۆشی، ئەو ئێستا پاڵەوانە و سێ ملوانکەی یەکەمبوونی بردووەتەوە و ئامادەکاری بۆ بەشداریی پاڵەوانێتیی پارائۆڵۆمپیک دەکات لە دوبەی. شکار تەنیا پاڵەوان نییە، بەڵکو لە هۆڵە وەرزشییەکەی پێنجوێن یاریدەدری راهێنەرە و چاودێری وەرزشکاران دەکات.
راهێنەرەکەی شکار دەڵێت، "شکار بووەتە جێگەی هیوا و دڵخۆشیی ئەوانەی کەمئەندامیان هەیە."
ئارام محەممەد، وەرزشکار ئاماژە بەوە دەکات، شکار "زۆر بەتوانایە، بەوە توڕە دەبێت کە بە هەڵە یاری بکەیت."
شکار بە رێژەی 85% ئۆتیزمی هەیە و نابیستە و توانای قسەکردنیشی نەبوو؛ دایک و باوکی لە چارەسەری نەخۆشییەکانی بێ هیوا بوون، بەڵام وەرزش ئێستا تەندروستیی بە جۆرێک باش کردووە، هێدی هێدی خەریکە فێری قسەکردن دەبێت و وشەیش دەبیستێت.
عومەر عەبدوڵڵا، باوکی شکار ئاماژەی بەوە کرد، "گوتیان بیبەیتە ئەمریکایش چاک نابێت، با دەستکاریی نەکەین، با عەقڵی تێکنەچێت."
توبا محەممەد، دایکی شکار گوتی، "ئێستا زۆر باش بووە، پاک و تەمیز بووە. سەرەتا کە منداڵ بوو وا نەبوو، دەمانگوت بکەوێت ملی دەشکێت."
گەنجە پاڵەوانەکەی پێنجوێن، بۆ بەردەوامبوون و زیاتر بەدەستهێنانی خەڵاتی سەرکەوتن، پێویستی بە یارمەتی و دەستگیرۆییکردنە، بەشداری لە پاڵەوانێتییەکان دەکات.
زۆر بەیەکەوە بوون و بەخشندەیی رێکەوتی راهێنەر بۆ شکار، وایکردووە هیچ رۆژێک بێ یەکدی هەڵنەکەن و زۆرترین کاتەکان پێکەوە بەسەر ببەن.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ