رووداو-هەولێر
سەرۆکی هەرێمی کوردستان لە یادی 37 ساڵەی ئەنفالی بادینان دا داوا دەکات بەغدا قەرەبووی زیانلێکەوتووان بکاتەوە و دەشڵێت، "ئەنفال و هەموو ئەو تاوانانەی لە رابردوودا کراون، دەبێ ببنە وانە و پەندیان لێ وەربگیرێت."
ئەمڕۆ دووشەممە، 25-08-2025، لە پەیامێکدا بۆ یادی 37 ساڵەی ئەنفالی بادینان، نێچیرڤان بارزانی، سەرۆکی هەرێمی کوردستان رایگەیاند: "بە رێزەوە هەموو شەهیدانی بادینان و کوردستان بەگشتی بەبیر دەهێنینەوە."
سەرۆکی هەرێمی کوردستان ئاماژەی بەوە کرد، ئەمڕۆ ژمارەیەک رووفاتی شەهیدانی ئەو تاوانکارییە لە دەڤەری بەری گارە، دوای رێکارە یاسایی و پزیشکییەکان لە رێوڕەسمێکدا بە خاک دەسپێردرێن و گوتی: "ئەمە ستەملێکراویی گەلێک نیشان دەدات."
نێچیرڤان بارزانی باسی لە مێژووی تاوانەکە کرد و گوتی: "ئەنفالی بادینان تاوانێکی دیکەی زنجیرە تاوانەکانی دەسەڵاتدارانی ئەوسای عێراق بوو دەرهەق بە گەلی کوردستان، کە لە 25ـی ئاب تا 6ـی ئەیلوولی 1988 لە دوا قۆناخی ئەنفالدا، خەڵکی سڤیل و خاک و هەوا و ژینگە و سرووشتی بادینانی گرتەوە."
لە پەیامەکەیدا، سەرۆکی هەرێمی کوردستان رایگەیاند: "داواکاریمان لە حکومەتی فیدراڵیی عێراق دووپات دەکەینەوە بۆ قەرەبووکردنەوەی قوربانییانی ئەنفالی بادینان و هەموو قوربانییانی تاوانەکانی رژێمی پێشووی عێراق." هەروەها جەختی کردەوە، "دادگای باڵای تاوانەکانی عێراق ئەنفالی بە جینۆساید و تاوانی جەنگ و تاوانی دژی مرۆڤایەتی ناساندووە، بۆیە مافی قوربانییانە بە هەموو شێوەیەک قەرەبوو بکرێنەوە."
نێچیرڤان بارزانی گوتی: "رابردووی تاڵی عێراق، جگە لە ماڵوێرانی هیچی تری بۆ عێراق و عێراقییەکان نەهێنا. ئەنفال و هەموو ئەو تاوانانەی لە رابردوودا بەرامبەر بە گەلی کوردستان کراون، دەبێ ببنە وانە و پەندیان لێ وەربگیرێت و ببنە هۆی مسۆگەرکردنی مافەکانی گەلی کوردستان بە هەموو پێکهاتەکانییەوە."
لە کۆتایی پەیامەکەیدا، سەرۆکی هەرێمی کوردستان داوای پێکەوەکارکردنی لایەنەکانی کرد بۆ بنیاتنانی داهاتوویەکی باشتر و رایگەیاند: "جەخت لە چارەسەرکردنی کێشەکان و پێکەوەژیانی ئاشتییانە و پاراستنی ئارامی و سەقامگیریی وڵات و پێکەوەکارکردنی هەموو لایەنە سیاسییەکان و پێکهاتەکان لە عێراق و هەرێمی کوردستان دەکەینەوە، تا پێکەوە ئێستا و داهاتوویەکی باشتر بنیات بنێین."
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ