هەڵەیەک روویدا! دووبارە هەوڵبدە
رووداو دیجیتاڵ
بەڕێوەبەری خزمەتگوزاری و ژینگەپارێزیی هەولێر دەڵێت، هەڵمەتی کۆکردنەوەی سەگە بێلانەکان بەردەوامە و 18 هەزار سەگ کۆکراونەتەوە؛ باسی لەوەش کرد: ''رۆژانە نزیکەی 10 تۆن خۆراک بەو سەگانە دەدرێ.''
دووشەممە، 25ـی ئابی 2025، ژیار جەلال، بەڕێوەبەری فەرمانگەی ژینگەی هەولێر بە تۆڕی میدیایی رووداوی راگەیاند: ''تیمەکانمان لە کۆکردنەوەی سەگە بێلانەکان بەردەوامن، کە دواتر نەزۆکیان دەکەن و بەرەڵڵایان دەکەن. رۆژانە نزیکەی 50 سەگ لەلایەن تیمەکانەوە دەگیرێ، بەڵام پزیشکانی ڤێتێرنەری رۆژانە توانایان هەیە نەشتەرگەری بۆ 10 بۆ 15 سەگ بکەن، ئەمەش پرۆسەکەی تاوەکو رادەیەک سست کردووە.''
بەگوێرەی ئاماری فەرمانگەی ژینگەی هەولێر، لە سەرەتای دەستپێکردنی هەڵمەتەکەوە 18 هەزار سەگی بێلانە کۆکراونەتەوە و 9 هەزاریان دوای نەشتەرگەری و پێدانی ڤاکسین بەرەڵڵا کراون.
بەڕێوەبەریی فەرمانگەی ژینگەی هەولێر گوتی: ''رۆژانە 8 بۆ 10 تۆن خۆراک بەو سەگانە دەدرێ کە لە شێڵتەرەکانن، وەک قاچ، سەر و باڵی مریشک.''
بەگوێرەی پێشبینییەکانی فەرمانگەی خزمەتگوزاری و ژینگەپارێزیی هەولێر، لە سنووری پارێزگاکەدا نزیکەی 30 هەزار سەگی بێلانە هەن.
لە هەولێر شێڵتەرێکی سەگە بەرەڵڵاکان لەلایەن پارێزگای هەولێرەوە بە گوژمەی زیاتر لە 480 ملیۆن دینار دروست کراوە و دەکەوێتە سەر رێگەی هەولێر - گوێڕ.
رۆژی 08-07-2023 وەک یەکەم شوێن، لە گەڕەکی ژینی دارەتوو لە هەولێر، دەست بە کۆکردنەوەی سەگە بەرەڵڵاکان کرا.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ