کامێراکانی خاڵ بۆ خاڵ لە رێگەی هەولێر-پیرمام وەکو تاقیکاری کەوتنەکار

 

رۆژی چوارشەممە، 25ـی ئۆکتۆبەری 2023، بەڕێوبەرایەتیی هاتووچۆی هەولێر بڵاویکردەوە، "بە مەبەستی پابەندکردنی شوفێران بە رۆیشتن بە خێرایی دیاریکراو لەسەر رێگەی هەولێر – پیرمام، کە ئەوپەڕی خێرایی 100 کیلۆمەترە لە کاژێرێکدا بۆ ئۆتۆمبێلی تایبەت و 80 کیلۆمەترە بۆ بارهەڵگرەکان، جگە لەنێو تونێلەکە کە ئەوپەڕی خێرایی 70 کیۆمەترە لە کاژێرێکدا، بە مەبەستی بەرزکردنەوەی ئاستی سەلامەتی لەو رێگەیەدا لە ئەمڕۆوە تاوەکو 1ـی مانگی داهاتوو کاژێر 12:00ـی شەو، سەرجەم کامێراکانی خاڵ بۆ خاڵ بە درێژایی رێگەکە لە بازگەی هەولێر تاوەکو پشت تونێلی پیرمام کاریان پێ دەکرێت وەکو تاقیکردنەوە".

 

لە 1ـی مانگی داهاتووەوە کامێراکان سەرپێچییەکان بە فەرمی تۆمار دەکەن. هاتووچۆی هەولێر داوا لە شۆفێران دەکات، پابەندی رۆیشتن بەخێرایی دیاریکراو بن.

 

خستنەکاری کامێرای خاڵ بۆ خاڵ لە رێگەی هەولێر – پیرمام دوای ئەوە دێت، 21ـی ئەم مانگە تەواوی کامێراکانی خاڵ بۆ خاڵ لە شەقامی 120 مەتری هەولێر کەوتنە کار. حکومەتی هەرێمی کوردستان دەڵێت، بە دانانی کامێراکان دەیەوێت چاودێریی وردی هاتووچۆ بخاتە سەر شەقامەکان بۆ ئەوەی "هاووڵاتییان لە رووداوەکانی هاتووچۆ پارێزراو بن".

 

پێشتر و بۆ یەکەمجار، کامێرای خاڵ بۆ خاڵ لە رێگەی سلێمانی – دووکان کاری پێکرا. حکومەتی هەرێمی کوردستان لە پلانیدایە لەسەرجەم رێگەی دەرەوەی شارەکان سیستمەکە بخاتە بواری جێبەجێکردنەوە.