رووداو دیجیتاڵ
وەزیری ئەوقاف و کاروباری ئایینی دەڵێ، عەنکاوە شوێنێکی گرنگی نیشتەجێبوونی کریستیانەکانە لە رۆژهەڵاتی نێوەڕاست؛ ئاماژە بەوەش دەکات، حکومەت بەردەوام دەبێ لە پاراستن و بەرەوپێشبردنی پێکەوەژیان.
رۆژی پێنجشەممە، 25-12-2025، شاندێکی حکومەتی هەرێمی کوردستان کە پێکهاتبوو لە پشتیوان سادق، وەزیری ئەوقاف و کاروباری ئایینی؛ ئومێد خۆشناو، پارێزگاری هەولێر و ژمارەیەک بەرپرسی حکومیی دیکە، بەبۆنەی جەژنی لەدایکبوونی پەیامبەر عیسا (د.خ)، سەردانی کەنیسەی کاسۆلیکی سریانی مار شیمۆنی لە عەنکاوە کرد.
پشتیوان سادق لە کۆنفرانسێکی رۆژنامەڤانی دا رایگەیاند: ''پیرۆزبایی لە هەموو مەسیحییەکانی کوردستان، عێراق و جیهان دەکەین. زۆر دڵخۆشین کە دەبینین کوردستان بەم شێوەیە پێکەوەژیانی تێدایە.''
وەزیری ئەوقاف و کاروباری ئایینیی هەرێمی کوردستان ئاماژەی بەوە کرد: ''ئەو پێکەوەژیانەی لە کوردستان هەیە، نموونەیەکی زۆر جوانە لەسەر ئاستی رۆژهەڵاتی نێوەڕاست''.
پشتیوان سادق عەنکاوە بە ''گەورەترین شاری نیشتەجێبوونی مەسیحییەکان'' ناودەبات لە رۆژهەڵاتی نێوەڕاست و دەڵێت: ''برایەتی، پێکەوەژیان و یەکدی قبووڵکردن لە کۆنەوە لە کوردستان هەبووە.''
وەزیری ئەوقاف و کاروباری ئایینی گوتی، حکومەت بەردەوام دەبێ لە پاراستن و بەرەوپێشبردنی پێکەوەژیان و ''کەسایەتییە ئایینیییەکانیش رۆڵێکی گەورەیان لە بەرەوپێشبردنی پێکەوەژیان هەیە. کوردستان موڵکی هەموومانە کە بە ئازادیی ئایینییەوە جوانە.''
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ