رووداو دیجیتاڵ
کارکردن لە پڕۆژەی دووسایدی هەولێر – کۆیە بەردەوامە. سەرپەرشتیاری پڕۆژەکە دەڵێت، کارەکانیان بە چڕی بەڕێوەدەچن و هیچ بەربەستێک بۆیان دروستنەبووە.
محەممەد خالید، بەڕێوەبەری پڕۆژەی رێگەی هەولێر – کۆیە لە بەڕێوەبەرایەتیی رێگەوبانی هەولێر، ئەمڕۆ شەممە بە تۆڕی میدیایی رووداوی گوت، "درێژیی رێگەکە 36.8 کیلۆمەترە. کارکردنمان گەیشتووەتە 20 کیلۆمەتر و رۆژانە 10 کاژێر کاری تێدا دەکەین."
بە سەرجەم ئەو کۆمپانیایانەی کار لە رێگەی هەولێر و کۆیەدا دەکەن، ژمارەی کارمەند و کرێکارەکانیان دەگاتە 1500 کەس.
بەڕێوەبەری پڕۆژەکە دەڵێت، "کارکردنیان لە قۆناخی خۆڵ و رێککاریدایە و تاوەکو ئەمڕۆ نەگەیشتوون بە قیرکردن، بەڵام کارکردن لە رێگەی زیاتر لە 300 ئامێرەوە لە پڕۆژەکەدا بێ بەربەست بەڕێوەدەچێت."
تەنیا ئاستەنگیی بەردەم خێراترکردنی دووسایدکردنی رێگەی هەولێر و کۆیە سەختیی ناوچەکەیە. محەممەد خالید باس لەوە دەکات، "شوێن هەیە دەبێت بە قووڵایی 30 مەتر پڕی بکەینەوە و ئامادەی بکەین بۆ قیرکردن."
بەڕێوەبەری پڕۆژەکە گوتی، "کاری بڕین و پڕکردنەوە لە رێگەکەدا تاوەکو ئەمڕۆ یەک ملیۆن مەتر سێجای تێپەڕاندووە."
رێگاکە پێش قیرتاوکردن چەند چینێکی دەوێت؛ لە بەشێکیدا چینی تێکەڵەکردن دەستیپێکردووە و بڕیارە لە داهاتوودا چینی بەردی شکاویش دەستپێبکات.
رۆژی 10-10-2024 مەسرور بارزانی، سەرۆکوەزیرانی هەرێمی کوردستان، بەردی بناخەی پڕۆژەکەی دانا و رایگەیاند، "شۆڕشی ئاوەدانی و خزمەتگوزاری" دەگەیێننە هەموو ناوچەکان بەبێ جیاوازی.
بودجەی سەرەکی پڕۆژەکە 560 ملیار دینارە و بۆ تەواوبوونی 1275 رۆژ دیاریکراوە.
پڕۆژەی رێگەی دووسایدی هەولێر - کۆیە ساڵی 2011 بە گوژمەی 461 ملیار دینار دەست بە جێبەجێکردنی کرا، بەڵام تەنیا 100 ملیار دیناری بۆ خەرج کرا و دواتر راگیرا.
رێگەی کۆیە - هەولێر یەکێک لە رێگە قەرەباڵخەکانی هەرێمی کوردستانە و بەگوێرەی راگەیێندراوێکی پێشووی پارێزگای هەولێر، دوای دووسایدکردنی رێگەکە ماوەکەی لە کاژێرێکەوە بۆ کەمتر لە 30 خولەک کەم دەبێتەوە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ