رووداو دیجیتاڵ
دوای راگرتنی گەشتە ئاسمانیی عومرە لە هەرێمی کوردستانەوە بۆ سعودیە، بەڕێوەبەرایەتیی حەج و عومرە رایگەیاند، "دەستپێدەکاتەوە".
کاروان ستوونی، گوتەبێژی بەڕێوەبەرایەتیی حەج و عومرە بە تۆڕی میدیایی رووداوی گوت: "دوای ئەوەی کۆمپانیاکان ئەمڕۆ بڕیاریاندا بەڵێننامە پڕبکەنەوە کە عومرەکاران ببەن و بیانگەڕێننەوە، هەر ئەمڕۆ گەشتە ئاسمانییەکانی عومرە دەستپێدەکاتەوە".
لە راگەیێندراوێکدا بەڕێوەبەرایەتیی حەج و عومرەی هەرێمی کوردستان رایگەیاند، بەڕێوەبەری گشتی لهگهڵ سهرجهم خاوهن كۆمپانیاكانی بهرنامه فرۆشی گەشتەکانی عومرە کۆبووەتەوە.
لە کۆبوونەوەکەدا بەڕێوەبەری گشتیی حەج و عومرە داوای لە خاوەن کۆمپانیاکانی بەرنامەفرۆشیی گەشتەکانی عومرە کردووە، کە "دهبێت بهرپرسیارێتی دواكهوتنی گهشتهكان ههڵبگرن و بهڵێننامه پڕبكهنهوه ههموو عومرهكاران له كاتی خۆیاندا ببهن و بگەڕێننهوە".
زیاتر لە دوو هەفتە بوو کێشەی گەڕانەوە بۆ ئەو هاونیشتمانییانە دروستبووە کە بە رێگەی ئاسمانی بۆ عومرە چوونەتە سعودیە.
ئەو هاونیشتمانییانەی لە سعودیە گیریان خواردبوو، زیاتر لە دوو هەزار کەس بوون و زۆرینەیان بە پاس گەڕانەوە.
بەهۆی کێشەی نەبوونی گەشتیی ئاسمانی بۆ عومرەکارانی هەرێمی کوردستان، 19ـی ئەم مانگە بەڕێوەبەرایەتیی حەج و عومرە رایگەیاند، هەموو گەشتە ئاسمانییەکانی عومرە بۆ سعودیە رادەگرن.
دوای بڕیارەکەی حەج و عومرەی هەرێمی کوردستان، دەسەڵاتی فڕۆکەوانیی مەدەنیی عێراق 20ـی ئاب رایگەیاند، "بەهۆی چلەی ئیمام حوسێنەوە گەشتەکان راگیرابوون".
وەلید دلفی، بەڕێوەبەری راگەیاندنی دەسەڵاتی فڕۆکەوانیی مەدەنیی عێراق، 20ـی ئاب بە رووداوی راگەیاند: "بەهۆی رێوڕەسمەکانی زیارەتی چلەی ماتەمینی ئیمام حوسێن، گەشتەکانی عومرە بۆ هەفتەیەک راگیرابوون، چونکە گوشاری زۆر لەسەر هێڵەکەمان هەبوو".
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ