رووداو دیجیتاڵ
لە ئێوارەی دوێنێوە رۆژنامەڤانێک، کە هاوکات کادیری پارتی دیموکراتی کوردستانە لە گەرمیان، لەلایەن هێزێکی ئەمنییەوە دەستگیرکرا بوو، بەرپرسی لقی پارتی لە سنوورەکە دەڵێ: "ئازاد کراوە".
حوسێن کەلاری، بەرپرسی لقی گەرمیانی پارتی دیموکراتی کوردستان، شەوی چوارشەممە 26-11-2025 بە تۆڕی میدیایی رووداوی راگەیاند: "کاروان کەلاری نزیک کاژێر 07:00ـی ئێوارەی ئەمڕۆ ئازادکرا".
هێزە ئەمنییەکانی ئیدارەی گەرمیان هیچ روونکردنەوەیەکیان لەسەر دەستگیرکردنی ئەو رۆژنامەڤانە بڵاونەکردووەتەوە. حوسێن کەلاری دەڵێت: "تاوەکو ئێستاش نازانین بۆچی دەستگیرکرابوو".
کاروان کەلاری، بەڕێوەبەری رادیۆی کازیوە لە قەزای کەلار لە ئیدارەی سەربەخۆی گەرمیان لە پارێزگای سلێمانی، لە ئێوارەی 25ـی ئەم مانگەوە لە ماڵ چووبووە دەرەوە و نەگەڕابووەوە، بەرەبەیانی ئەمڕۆ رادیۆکە لە راگەیێندراوێکدا رایگەیاند: "لە رێگەی پەیوەندیی تایبەتەوە زانیومانە دەستگیرکراوە".
بەرپرسی لقی گەرمیانی پارتی گوتی: "کاروان لەلایەن دەزگای ئاسایشی هەرێمی کوردستان- سلێمانی دەستگیرکرابوو".
رەحمان غەریب، رێکخەری سەنتەری میترۆ، شەوی چوارشەممە بە رووداوی گوت: "ئێمە نەمانتوانی بزانین کاروان کەلاری بۆچی و بە چی ماددەیەکی یاسایی دەستگیرکرابوو".
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ