رووداو دیجیتاڵ
لە رووداوێکی هاتووچۆدا لەسەر رێگەی تیکاب - سایین قەڵا لە پارێزگای ورمێی رۆژهەڵاتی کوردستان، هاونیشتمانییەک گیانی لەدەستدا و دوو هاونیشتمانیی دیکە بریندار بوون.
لەسەر رێگەی تیکاب - سایین قەڵا لە پارێزگای ورمێی رۆژهەڵاتی کوردستان، بەهۆی پێکدادانی دوو ئۆتۆمبێلی تایبەت لە جۆری پراید و پیژۆ 405، هاونیشتمانییەک کە شۆفێری یەکێک لە ئۆتۆمبێلەکان بوو، گیانی لەدەستدا و دوو کەسی دیکەش بریندار بوون.
ئەحمەد ئەسلانی، بەڕێوەبەری کۆمەڵەی مانگی سووری تیکاب لەوبارەیەوە گوتی، ''رووداوەکە کاژێر 15:34ـی دوێنێ روویداوە کە یەکێک لە شۆفێرەکان دەستبەجێ گیانی لەدەستداوە و دوو سەرنشینی ئۆتۆمبێلی جۆری پرایدیش دوای رزگارکردن و هێنانە دەرەوەیان، گەیێندراونەتە نەخۆشخانەیەکی شارەکە.''
تیکاب 280 کیلۆمەتری لە شاری ورمێ دوورە و تەنیا شاری پارێزگاکەیە لەگەڵ پارێزگاکانی سنە، پارێزگای زەنجان و تەورێز (ئازەربایجانی رۆژهەڵات)ـی ئێران هاوسنوورە. شاری سایین قەڵاش 80 کیلۆمەتر لە رۆژئاوای تیکاب هەڵکەوتووە.
ساڵانە ژمارەیەکی زۆری خەڵک لە رووداوەکانی هاتووچۆ لە رۆژهەڵاتی کوردستان و ئێران گیانیان لەدەستدەدەن.
کەمال هادیانفەر، بەڕێوەبەری گشتیی پۆلیسی هاتووچۆی ئێران، رۆژی 26-11-2023 رایگەیاند، ''لە سەرەتای نەورۆزی 2023ەوە زیاتر لە 12 هەزار کەس بە رووداوی هاتووچۆ گیانیان لەدەستداوە و 300 هەزار کەسیش بریندار بوون کە ژمارەی قوربانیان بەراورد بە [ساڵی 2022] 7.3٪ زیادی کردووە''.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ