پێشوازیی ئەیمەن سەفەدی، جێگری سەرۆکوەزیران و وەزیری دەرەوەی ئوردن لە نێچیرڤان بارزانی، سەرۆکی هەرێمی کوردستان.
رووداو دیجیتاڵ
نێچیرڤان بارزانی، سەرۆکی هەرێمی کوردستان لەگەڵ ئەیمەن سەفەدی، جێگری سەرۆکوەزیران و وەزیری دەرەوەی ئوردن، لە عەممانی پایتەختی ئوردن کۆبووەوە.
سەرۆکایەتیی هەرێمی کوردستان دەڵێت، هەردوولا باسيان له برهودانى زياتر به پەیوەندییەکانی عێراق و هەرێمی کوردستان لهگهڵ ئوردن لە بوارە جیاجياكاندا كرد، ههروهها پێشهاتە ناوچەیی و نێودەوڵەتییەکانيان تاوتوێ كرد و جەختیان لەسەر گرنگیی هەماهەنگی بۆ پاراستنى سەقامگیری لە ناوچەکەدا کردەوە.
کۆبوونەوەکە ئێوارهى ئەمڕۆ يهكشهممه، 27-4-2025 بوو لە بارەگای وەزارەتی دەرەوەی ئوردن.
سەرۆکایەتیی هەرێمی کوردستان دەشڵێت، "سەرۆک نێچیرڤان بارزانی وێڕاى دهربڕينى پێزانینی خۆی بۆ پەیوەندییهكانى ههرێمى كوردستان و عێراق لهگهڵ ئوردن، ستایشی رۆڵی ناوچەیی و هەوڵەکانی ئوردنى بۆ بەهێزکردنی ئاشتی کرد. بهڕێز وهزيرى دهرهوهى ئوردنيش، وێڕاى دهربڕینی خۆشحاڵیی خۆی به سهردانی بهڕێز سەرۆکى ههرێمى كوردستان، خواستى ئوردنى بۆ فراوانکردنی هاوکاری لەگەڵ عێراق و هەرێمی کوردستاندا، دووپات کردەوە".
بە وێنە؛ سەردانی نێچیرڤان بارزانی بۆ وەزارەتی دەرەوەی ئوردن و کۆبوونەوەی لەگەڵ ئەیمەن سەفەدی، وەزیری دەرەوەی وڵاتەکە pic.twitter.com/muG2uvy0YK
— Rudaw (@Rudawkurdish) April 27, 2025
هەر ئەمڕۆ و بەر لە وەزیری دەرەوە، سەرۆکی هەرێمی کوردستان لەگەڵ شای ئوردن کۆبووەوە و "پێزانینی قووڵی خۆی بۆ هەڵوێستهكانى شانشینی ئوردنيی هاشمی له پشتگيرى بۆ عێراق و هەرێمی کوردستان دەربڕی". نێچیرڤان بارزانی لە پۆستێکی ئێکس دا دەڵێت، "پابەندین بە بەهێزترکردنی پەیوەندییەکانمان لەگەڵ ئوردن".
کۆبوونەوەی نێچیرڤان بارزانی، سەرۆکی هەرێمی کوردستان و شا عەبدوڵڵای دووەم، ئەمڕۆ یەکشەممە، 27-04-2025، لە عەممانی پایتەختی ئوردن کرا.
نێچیرڤان بارزانی لە پۆستێکی ئێکس لەبارەی کۆبوونەوەکە نووسی: "شەرەفمەندم کە ئەمڕۆ لە عەممان لەگەڵ خاوەنشکۆ شا عەبدوڵڵای دووەم کۆبوومەوە. سوپاسی خاوەنشکۆ و خەڵکی شانشینی ئوردنم کرد لە بەرامبەر پێشوازییە گەرم و میواندۆستییە مەزنەکەیان و پشتیوانیی بەردەوامیان بۆ عێراق و هەرێمی کوردستان".
بەگوێرەی راگەیێندراوێکی سەرۆکایەتیی هەرێمی کوردستان، شا عەبدوڵڵای دووەم خواستى وڵاتهكهى بۆ پتهوكردنى پەیوەندییەکان و هاوکاريی هاوبهش لەگەڵ عێراق و هەرێمی کوردستاندا دووپات کردەوە، ههروهها داكۆكیی لە پابهنديى ئوردن بۆ پشتگيريى ههر هەنگاوێک کرد کە ئاسايش و سەقامگیری و پێشکەوتن بۆ گەلانی ناوچەکە بەهێز بکات.
بە وێنە؛ شا عەبدوڵڵای دووەم، پادشای ئوردن بە باوەشێکی گەرم پێشوازییەکی شاهانەی لە نێچیرڤان بارزانی، سەرۆکی هەرێمی کوردستان کرد pic.twitter.com/AcoHokRb6c
— Rudaw (@Rudawkurdish) April 27, 2025
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ