هەڵەیەک روویدا! دووبارە هەوڵبدە
رووداو دیجیتاڵ
گوتەبێژی یەکێتی لەسەر هێرشەکەی لالەزار دەڵێت، لە چەند رۆژی رابردوودا هەوڵێک هەبووە بۆ تێکدانی ئاسایشی سلێمانی، راپەڕین و گەرمیان و هەرێمی کوردستان بە گشتی، "بەڵام هێزەکانی حکومەت رووبەڕووی تۆمەتبار و تاوانباران بوونەوە و رادەستی یاسا کراون".
کاروان گەزنەیی، گوتەبێژی یەکێتیی نیشتمانیی کوردستان قسەی بۆ رۆژنامەڤانان کرد، لەسەر رووداوەکەی لالەزار ئاماژەی بە "دانپێدانانی گرووپێک" کرد و گوتی، "بەداخەوە هەوڵی تیرۆرکردنی سەرۆکی یەکێتی هەبووە. ئێمە وەکو یەکێتی رێگە دەگرین لە هەموو دەستوەردانێکی حیزبی و داوا لە دەسەڵاتی دادوەری دەکەین یاسا سەروەر بێت و تۆمەتباران و تاوانباران رووبەڕووی یاسا بکرێنەوە".
داوای لە حکومەتی هەرێمی کوردستانیش کرد "بڕیارەکانی دادگە جێبەجێ بکات بۆ ئەوەی تۆمەتباران و تاوانباران سزای یاسایی خۆیان وەربگرن، چونکە یەکێتی نیگەرانە، دۆخێک هەبووە، ئەوەی لەڕێگەی حکومەتەوە پێمان گەیشتووە و ئەو بەڵگانەی ئێوەش بینیتان، هەوڵێک هەبووە بۆ تێکدانی ئاسایشی هەرێمی کوردستان و تیرۆرکردنی بافڵ تاڵەبانی".
ئەمڕۆ دەزگای ئاسایشی هەرێمی کوردستان (سلێمانی)، "دانپێدانانی گرووپەکەی لالەزار"ی بڵاوکردەوە.
گوتەبێژی یەکێتی لەبارەی دەستگیرکردنی شاسوار عەبدولواحید گوتی، ئەو کەیسە پەیوەندی بە دەستگیرکردنی لاهوور جەنگییەوە نییە و "دۆسیەیەکی جیاوازە. کاک شاسوار چەندین جار بێڕێزی بە یەکێتی کردووە، بەڵام هیچ کات سکاڵامان لەسەری نەبووە. ئەمە سکاڵای هاووڵاتییەکە و لە دادگەیە".
گوتەبێژی یەکێتی باسی مووچەی کرد، رایگەیاند، هەرچەندە ئەم بابەتە پەیوەندی بە حکومەتەوە هەیە، "بەڵام یەکێتی وەکو هێزێکی بەشدار لە حکومەت بە ئەرکی خۆی هەستاوە و هەڤاڵ بافڵ جەلال تاڵەبانی سەردانی بەغدای کرد بۆ ئەوەی کارئاسانی و زەوینەسازی بکات بۆ لێکتێگەیشتنی نیوان هەولێر و بەغدا بۆ دەستەبەرکردنی شایستە داراییەکان و دابینکردنی مووچە، هاوخەمین لەگەڵ ئەم بابەتە و پێمانوایە ئەم بابەتە بەرەو چارەسەر دەڕوات".
لە بەشێکی دیکەی قسەکانی دا، گوتەبێژی یەکێتی باسی پێکهێنانی حکومەتی کرد و رایگەیاند، "دوو رەهەندی هەیە، یەکێکیان پەیوەندی بە کارنامە هەیە و لەسەر ئەوە گەیشتووین بە رێککەوتن، بەڵام بۆ جێبەجێکردنی کارنامەکە، گرنگە پۆستەکان بە شێوەیەک دابەش بکرێن، ئەم کارنامەیە لەنێو حکومەت و وەزارەتەکان جێگەی ببێتەوە".
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ