رووداو دیجیتاڵ
بەهۆی رووداوێکی هاتووچۆوە لە نزیک شاری ئەلیگودەرزی سەر بە پارێزگای لوڕستان، 9 کەس بریندار بوون، بەڕێوەبەری مانگی سووری پارێزگاکە دەڵێت، پێنجـیان گواستراونەتەوە بۆ نەخۆشخانە.
ئێوارەی دوێنێ پێنجشەممە، 26-09-2024، لە نزیک شاری ئەلیگودەرزی پارێزگای لوڕستانی رۆژهەڵاتی کوردستان، بەهۆی پێکدادانی دوو ئۆتۆمبێلی تایبەت لە جۆری سەمەند و بارهەڵگرێکی بچووک، 9 کەس بریندار بوون.
محەممەد قەدەمی، بەڕێوەبەری گشتیی مانگی سووری پارێزگاکە لەوبارەوە رایگەیاند، دەستبەجێ تیمەکانیان گەیشتوونەتە شوێنی رووداوەکە و دوای دەرهێنانەوەیان، چارەسەری سەرەتایی بۆ برینداران کراوە.
محەممەد قەدەمی ئەوەشی خستەڕوو، پێنج کەس لە برینداران گواستراونەتەوە بۆ نەخۆشخانەی شاری ئەلیگودەرز و چواریان نێردراونەتەوە ماڵەوە.
ساڵانە لە ئێران و رۆژهەڵاتی کوردستان ژمارەیەکی زۆری خەڵک بە رووداوی هاتووچۆ گیانیان لەدەستدەدەن.
بەگوێرەی راپۆرتی دادپزیشکیی ئێران، لە 21-03-2024ـوە تاوەکو 21-07-2024، شەش هەزار و 262 کەس لە ئێران و رۆژهەڵاتی کوردستان بەهۆی رووداوی هاتووچۆوە گیانیان لەدەستداوە و 127 هەزار و 350 کەسیش بریندار بوون.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ