رووداو دیجیتاڵ
سەرۆکایەتیی شارەوانیی هەولێر رایگەیاند، سبەی تیروپشک بۆ فەرمانبەرانی سەنتەری شار دەکرێت بۆ وەرگرتنی زەوی. بەرپرسێکی شارەوانییەکە دەڵێ: "ئەوانەی کارتی زانیارییان سەنتەری هەولێرە، زەوی وەردەگرن".
بەرپرسێک لە شارەوانیی هەولێر بە تۆڕی میدیایی رووداوی گوت: "زەوییەکان 7 هەزار و 500 پارچە زەوین و بەو کەسانە دەدرێت، کە فەرمانبەری فەرمانگەکانی سەنتەری شاری هەولێرن".
تیروپشکی دابەشکردنی زەوییەکان سبەی کاژێر 10:30ـی بەیانی، بە ئامادەبوونی وەزیری شارەوانی و پارێزگاری هەولێر دەکرێت.
تاوەکو ئێستا لە سنووری شارەوانیی شاری هەولێر دوو جار زەوی دابەشکراوە، جارێک چوار هەزار پارچە و جارێکیش 14 هەزار پارچە.
27ـی ئاداری 2024، ئەنجوومەنی وەزیرانی هەرێمی کوردستان بڕیاری دابەشکردنی زەوی بۆ ئەو فەرمانبەر و خانەنشینانە دا، کە سوودمەند نەبوون.
رووبەری ئەو زەوییەی بۆ هەر فەرمانبەر یان پێشمەرگە و خانەنشینێک تەرخان دەکرێت 200 مەتر دووجایە و دابەشکردنەکەش بە تیروپشک و بە گوێرەی سیستمی خاڵبەندی دەبێت.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ