رووداو دیجیتاڵ
کۆرپەیەک لە بەردەم مزگەوتی گوندێک لە نزیک تەقتەق دۆزرایەوە و ئێستا لە نەخۆشخانەیەکی کۆیە لەژێر چاودێریدایە. تەندروستیی کۆیە دەڵێت: "تەندروستیی منداڵەکە باشە".
کۆرپەکە لە بەردەم مزگەوتی ناحیەی ئیلنجاخ دۆزراوەتەوە و براوەتە نەخۆشخانەی تەقتەق و دواتر رەوانەی نەخۆشخانەیەکی قەزای کۆیە کراوە لە پارێزگای هەولێر.
هاوکار عەلی، گوتەبێژی تەندروستیی کۆیە بە تۆڕی میدیایی رووداوی گوت: "کۆرپەکە لە نەخۆشخانەی فێرکاری شەهید دکتۆر خالیدە؛ رەگەزی نێرە و تەندروستی جێگیرە".
ئێستا کارمەندانی نەخۆشخانەکە خزمەتی کۆرپەکە دەکەن. گوتەبێژی تەندروستیی کۆیە ئاماژەی بەوەشکرد: "کۆرپەکە دەمێنێتەوە تاوەکو دادوەر بڕیارێک لە بارەیەوە دەدات".
ئەو منداڵ یان کۆرپانەی دەدۆزێنەوە، بە بڕیاری دادوەر یان دەدرێنە خێزانی جێگرەوە، یان رەوانەی خانەی بێسەرپەرشتان دەکرێن.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ