باوکی حوسێن خاڵەیی لە نەخۆشخانە
رووداو دیجیتاڵ
کەسایەتی و چالاکڤانانی سەردەشت سەردانی ماڵی باوکی حوسێن خاڵەییان کرد، ئەو کۆڵبەرە 23 ساڵانەی یەکشەممەی رابردوو لە نەخۆشخانەیەکی ورمێ گیانی لەدەستدا و باوکی بە بەخشینی جگەر و گورچیلەکانی، ژیانی بە سێ نەخۆشی کەمداهات بەخشییەوە.
حوسێن خاڵەیی تەنیا کاسبکاری خێزانەکەی بوو. ئەو لە کاتی کۆڵبەری بەهۆی کەوتن تووشی وەستانی مێشک بوو و گیانی لەدەستدا. سەرەڕای ئەوەی پێشنیازی پارەیەکی زۆر بە باوکی کرابوو تاوەکو ئەندامانی جەستەی بفرۆشێت، بەڵام باوکی بێ بەرامبەر بەشێک لە ئەندامانی جەستەی کوڕەکەیی بەخشی.
حوسێن خێزاندار بوو و منداڵێکی دوو ساڵانی هەیە. سێ برا و خوشکیشی نیڤشکانن (خاوەن پێداویستیی تایبەتن) و دۆخی ئابووریی باوکی باش نییە، بۆیە چەند کەسێک دەیانەوێت کەمپینێک بۆ کۆکردنەوەی هاوکاری بۆیان بەڕێبخەن.
کەسایەتی و چالاکڤانانی سەردەشت هەوڵیاندا محەممەد خاڵەیی رازی بکەن، کەمپینی کۆکردنەوەی هاوکاری لە ماڵەکەی خۆی رابگەیێندرێت، بەڵام ئەو رازی نەبوو و دەڵێت، بۆ پارە ئەو کارەی نەکردووە.
کەسایەتی و چالاکڤانانی سەردەشت دەیانەوێت بە بەڕێخستنی ئەو کەمپینە و کۆکردنەوەی هاوکاری بۆ خێزانی ئەو کۆڵبەرە، خەمی ژیان لەسەر ژیانی ئەو خێزانە سووک بکەن. ئەوەی دەمێنێتەوە، خواستی خەڵک و خێرخوازانە بۆ بەشداریکردن لە هاوکاریکردنی خێزانێک کە ئەوەندەی دەستیان بەتاڵە، زۆر زیاتر دڵیان گەورەیە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ