نوێنەری پێشمەرگە لە ئۆپەراسیۆنە هاوبەشەکان: سەرەتای ساڵی نوێ لیوای 20 لە ناوچەکان جێگیر دەکرێن

 

رۆژی سێشەممە، 28-11-2023، عەمید روکن عادل جەبار زەنگەنە، نوێنەری وەزارەتی پێشمەرگە لە فەرماندەیی ئۆپەراسیۆنە هاوبەشەکانی عێراق، بە تۆڕی میدیایی رووداوی راگەیاند: "بڕیارە رۆژی شەممەی هەفتەی داهاتوو ئەو هێزانە پەیوەندیی بە بنکەکانەوە مەشق و راهێنانەوە لەو سێ پارێزگایەی دیاریکراوە بکەن، پاشان سێ مانگ مەشق و راهێنانیان پێدەکەن کە بەشێکی لەسەر چەک و تەقەمەنی دەبێت و بەشێکیشی راهێنانی دیکە وەکو دەروونی و کاروباری سەربازی و رێکارەکان دەبێت، پاشان بەپێی پێویستی لە ناوچەکانی بۆشایی ئەمنی بڵاودەکرێنەوە."

 

سەبارەت بە کاتی خەرجکردنی مووچەکانیان، عەمید روکن عادل جەبار زەنگەنە گوتی: "جگە لە مووچەی مانگی کانوونی یەکەمی ئەم ساڵ، مووچەی دیکەیان بۆ خەرجدەکرێت، چونکە کێشەی داراییان نەماوە." گوتیشی: "جگە لە مووچەی مانگی داهاتوو، هەوڵدەدەرێت ئەو مووچانەی مانگەکانی دیکەی ئەم ساڵیشیان بەپێی رێکار و سیستم بۆ تەرخانبکرێت."

 

رۆژی دووشەممە، 27-11-2023، وەزارەتی بەرگریی عێراق لە راگەیێندراوێکدا داوای لە سەرباز و پێشمەرگەکانی لیوای 20ـی هاوبەشی عێراق کرد، لە رۆژی شەممەوە (2-12-2023) پەیوەندیی بە سەنتەرەکانی راهێنان لە پارێزگاکانی، کەرکووک، دیالە، نەینەوا بکەن بۆ ئەوەی دەستبەکارببن و دواتر دەست بە مەشق و راهێنان و پڕچەککردن و دواتر بڵاوکردنەوەیان بکرێت.

 

هەرێم کەمال ئاغا، سەرۆکی فراکسیۆنی یەکێتی نیشتمانی کوردستان، رۆژی سێشەممە 28-11-2023، لەوبارەیەوە بەتۆڕی میدیایی رووداوی راگەیاند: " کاروباری دارایی ئەو لیوایە تەواو بووە، بڕیارە سەرەتای ساڵی داهاتوو بڵاوەیان پێبکرێت، بڵاوکردنەوەی ئەو هێزە زۆر گرنگ دەبێت، چونکە دەبێتە هۆکارێک بۆ رێگریی لەو هەڕەشانەی جاروبار چەکدارانی داعش دەیکەن و هێرشەکانیان کەمدەکاتەوە."

 

مانگی ئابی ساڵی 2021 وەزارەتی پێشمەرگە و سوپای عێراق گەیشتنە رێککەوتن لەبارەی پێکهێنانی دوو لیوای هاوبەشی پێشمەرگە و سوپای عێراق، بۆ ئەوەی لەو ناوچانە بڵاوبکرێنەوە، کە بۆشایی ئەمنین لە نێوان بەغدا و هەرێمی کوردستان و چەکدارانی داعش سوودیان لێوەردەگرن بۆ هێرشکردنە سەر ئەو هێزانە و خەڵکی ئەو ناوچانە.

 

نزیکەی 560 کیلۆمەتر بۆشایی ئەمنی لەنێوان هێزەکانی پێشمەرگە و سوپای عێراقدا هەیە، زۆرینەی دوای رووداوەکانی 16ی ئۆکتۆبەری ساڵی 2017 دروستبوون و بە هۆکاری سەرەکیی هێرشە ناوبەناوەکانی چەکدارانی داعش دادەنرێن بۆسەر هێزەکانی پێشمەرگە و سوپای عێراق.

 

هێزە هاوبەشەکە لە لیوای 20ی پێشمەرگە و لیوای 66ی سوپای عێراق پێکدێن، سەرپەرشتیاری یەکێک لە لیواکان کورد دەبێت و جێگرەکەی لەنەتەوەی عەرەب دەبێت، ئەوی دیکەشيان فەرماندەکەی عەرەب بێت و جێگرەکەی لە نەتەوەی کورد دەبێت.

 

لیوای 20ی هاوبەش زیاتر لە 3,700 پێشمەرگە دەبێت و مووچە و پڕچەککردنیان لەسەر وەزارەتی بەرگریی عێراقە.