رووداو دیجیتاڵ
لە پایتەختی سوێد یادی حوسێن کوردنەژاد، نووسەر و ئەکادیمیی کوردی خەڵکی ورمێی رۆژهەڵاتی کوردستان بەڕێوەچوو.
ئەمڕۆ یەکشەممە، 28ی کانوونی یەکەمی 2025، لە شاری ستۆکهۆڵمی پایتەختی سوێد، بە بەشداریی دەیان کەس لە رەوەندی کوردی لەو وڵاتە، پرسە و کۆڕیادێک بۆ حوسێن کوردنەژاد، نووسەر، توێژەر و ئەکادیمیی کورد بەڕێوەچوو.
لە رێورەسمەکەدا ژمارەیەک نووسەر، رۆشنبیر، کەسایەتی ئەکادیمی و سیاسی، دۆست و کەسوکاری حوسێن کوردنەژاد بەشدار بوون.
حوسێن کوردنەژاد، نووسەر و ئەکادیمیی کورد، شەوی هەینی 12ی کانوونی یەکەمی 2025 لە شاری هەولێر بەهۆی وەستانی دڵەوە گیانی لەدەستدا و رۆژی 16ی کانوونی یەکەم لە رێوڕەسمێکدا لە پیرمام بەخاک سپێردرا.
حوسێن کوردنەژاد ساڵی 1954 لە شاری ورمێی رۆژهەڵاتی کوردستان لەدایک بووە. ساڵی 1974 بۆ خوێندن چووەتە بەریتانیا و لەوێ تێکەڵ بە کار و چالاکی سیاسیی کورد لە تاراوگە بووە. ساڵی 1979 بووەتە ئەندامی حیزبی دیموکراتی کوردستانی ئێران و ساڵی 1984 دەستی لە ئەندامێتی ئەو حیزبە کشاندووەتەوە.
حوسێن کوردنەژاد لە ساڵی 2011ـەوە تاوەکو ئەو کاتەی کۆچی دوایی کرد وەکو توێژەر لە ئەنیستیتیوتی توێژینەوەی گەشەپێدانی کوردستان لە هەولێر کاری دەکرد.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ