هەڵەیەک روویدا! دووبارە هەوڵبدە
کوردستان
زەوییەکی وشک لە خوارووی عێراق، وێنەکە لەلایەن بڵند تاهیر، وێنەگری رووداو دجیتاڵ چرکێندراوە و بۆ روونکردنەوەی هەواڵەکەیە
رووداو دیجیتاڵ
گوتەبێژی وەزارەتی کشتوکاڵ رایگەیاند، بەشێکی زۆری نیشانەکانی وشکەساڵی لە هەرێمی کوردستان دەرکەوتوون. دەشڵێت: "ئەم ساڵ نزیکەی 50%ـی بەرهەمی دانەوێڵە سەوز نەبووە."
رۆژی پێنجشەممە، 29ـی ئایاری 2025، هیوا عەلی، گوتەبێژی وەزارەتی کشتوکاڵ و سەرچاوەکانی ئاوی هەرێمی کوردستان، بە تۆڕی میدیایی رووداوی راگەیاند: "وشکەساڵیی سەرتاسەریمان نەبووە، بەڵام زۆربەی نیشانەکانی دەرکەوتوون؛ کە نیوەی بەرهەمی دانەوێڵە سەوز نەبووە، ئاوی ژێر زەوی، بەنداوەکان کەمی کردووە و بەشێک لە کانییەکان وشک بوون، ئەمانە گرنگترین ئەو نیشانەن و بەدیکراون."
بە گوتەی هیوا عەلی، ئەم بارانەی لە ماوەی رابردوو باری، هیچ سوودێکی بۆ بەرهەمی کشتوکاڵ و دانەوێڵەکان نەبوو، چونکە ئێستا کاتی دروێنەیانە.
لە هەرێمی کوردستان نزیکەی 3 ملیۆن دۆنم زەوی هەن، کە شیاون بۆ دانەوێڵە، ساڵانە زۆرینەیان دەکرێنە گەنم و بەشێکیشی جۆی تێدا دەچێندرێت. گوتەبێژی وەزارەتی کشتوکاڵ دەڵێت: "ئەم ساڵ نیوەی بەرهەمی دانەوێڵە سەوز نەبووە، کە ئەمەش دەبێتە هۆی ئەوەی بەرهەمیان بەراورد بە پار زۆر کەم بێتەوە."
لەبارەی رێگەی چارەسەرکردن و رووبەڕووبوونەوەی وشکەساڵی، هیوا عەلی گوتی: "پێداچوونەوە بە بەرنامەی خاک و ئاودا دەکەین، ژمارەی بەنداوەکان زیاد دەکەین، هۆشداری زیاتر بە هاووڵاتییان و جووتیاران دەدرێت لەبارەی بەکارهێنانی ئاو، هەروەها رێگەی کشتوکاڵی زیرەک بەکاردەهێنین وەکو سیستمی دڵۆپاندن."
ئەم ساڵ بەراورد بە ساڵی رابردوو بارانی کەم باریوە، هەرچەندە هێشتا وەزارەتی کشتوکاڵ بە فەرمی وشکەساڵی رانەگەیاندووە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ