رووداو دیجیتاڵ
باڵیۆزی ڤاتیکان لە عێراق لە دیداریدا لەگەڵ سەرۆک بارزانی "بەتووندی سەرکۆنەی هێرش و پەلامارەكانی كۆماری ئیسلامیی ئێرانی بۆ سەر ناوچە جیاجیاكانی هەرێمی كوردستان كرد".
رۆژی پێنجشەممە 29-08-2022 سەرۆک مەسعود بارزانی لە پیرمام پێشوازی لە میتجا لێسکۆڤار، باڵیۆزی ڤاتیکان لە عێراق کرد.
دوێنێ سوپای پاسدارانی ئێران لە بنکە و بارەگاکانی حیزبەکانی رۆژهەڵاتی کوردستانی بۆردوومان کرد کە بەهۆیەوە لانی کەم 17 کەس گیانیان لەدەستدا و نزیکەی 50ـی دیکەش بریندار بوون.
بەپێی راگەیێندراوی بارەگای بارزانی، لە دیدارەکەدا باڵیۆزی ڤاتیکان سەرەخۆشی لە سەرۆك بارزانی و گەلی كوردستان كردووە بۆ قوربانییانی هێرشەکە.
لە بەشێکی دیکەی راگەیێندراوەکەدا هاتووە، باڵیۆزی ڤاتیكان لە عێراق پێزانینی بۆ پێگە و رۆڵی سەرۆك بارزانی لە خەباتی گەلی كوردستان و بەرقەراركردنی ئاشتیدا هەبووە، هەروەها وێڕای دەربڕینی پێزانینی خۆی بۆ كولتووری پێكەوەژیانی گەلی كوردستان، سوپاسی گەلی كوردستانیشی كرد كە لە رۆژە سەختەكاندا باوەشیان بۆ سەدان هەزار ئاوارە و پەنابەر لە پێكهاتە جیاجیاكان و بە تایبەت كریستیانەكان كردووەتەوە.
لەو دیدارەدا سەرۆك بارزانی ئاماژەی بە قووڵایی فەرهەنگی پێكەوەژیان لەناو گەلی كوردستان داوە و جەختیشی لەوە كردووەتەوە كە گەلی كوردستان لە برەودانی ئەو فەرهەنگە بەردەوام دەبێت.
لە درێژەی دیدارەكەدا بیروڕا لەبارەی بارودۆخی سیاسیی عێراق ئاڵوگۆڕ كرا و سەرۆك بارزانی ئەوەی دووپاتكردووەتەوە كە پێویستە كێشەكانی عێراق لەسەر بنەمای گفتوگۆ و دەستوور چارەسەر بكرێت.
بەپێی راگەیێندراوەکە، لە كۆتایی ئەو دیدارەدا باڵیۆزی ڤاتیكان سوپاسی گەلی كوردستان و دامەزراوەكانی هەرێمی كوردستانی كرد بۆ پێشوازی و میوانداریی پاپا فرانسیس، پاپای ڤاتیکان و هەر بەو بۆنەیەوە دیارییەكی تایبەتی پێشكێشی سەرۆك بارزانی كرد.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ