رووداو دیجیتاڵ
لە کۆبوونەوەی ئەنجوومەنی وەزاریی ئەمنیی عێراق، کە بە سەرۆکایەتی محەممەد شیاع سوودانی، فەرماندەی گشتیی هێزە چەکدارەکان و سەرۆکوەزیرانی عێراق بوو، تاوتوێی دروستکردنی لیژنەیەکی پشتیوانیی ناوەندیی هەمیشەیی بۆ چارەسەکردنی کێشە و تەگەرەکانی پەیوەست بە کاروباری نشینگە لەنێوان وەزارەتی ناوخۆی هەرێمی کوردستان و عێراق کرا. هەروەها بڕیاردرا لێپێچینەوەی یاسایی لەگەڵ ئەو کەسانە بکرێت کە تواناکانی دەوڵەت بۆ گوشار خستنە سەر دەنگدەران بەکاردەهێنن.
رۆژی چوارشەممە 29-11-2023، محەممەد شیاع سوودانی، فەرماندەی گشتیی هێزە چەکدارەکان و سەرۆکوەزیرانی عێراق سەرۆکایەتی کۆبوونەوەی ئەنجوومەنی وەزاریی ئاسایشی نیشتمانیی عێراق کرد.
گوتەبێژی فەرماندەی گشتیی هێزە چەکدارەکانی عێراق لە راگەیێندراوێکدا رایگەیاند: "باسی هەوڵی هێزە ئەمنییەکان بۆ سەقامگیری و ئاسایش لە رێگەی بەرەنگاربوونەوەی تیرۆر و راوەدونانی تاوانی رێکخراو کرا، جگە لە تاوتوێکردنی ئەو پلە وەزیفییانەی تایبەتن بە دەزگا ئەمنی و هەواڵگرییەکان لە ئەنجوومەنی خزمەتی فیدڕاڵی و ئەو پشکنینانەی بۆ پێشکێشکاران دەکرێت."
لە کۆبوونەوەکەدا باسی رێکارەکانی لیژنەی فەرمانی دیوانی ژمارە 22220ـی ساڵی 2022 کراوە لەبارەی ئەو لیژنەیەی بەپێی ئەو فەرمانە دروستکراوە بەو پێیەی لیژنەیەکی پشتیوانیی ناوەندیی و هەمیشەیی لەنێوان وەزارەتی ناوخۆی هەرێمی کوردستان و عێراق هەبێت بۆ چارەسەکردنی کێشە و تەگەرەکانی بەردەم کاروباری مانەوە.
لە راگەیێندراوی گوتەبێژی فەرماندەی گشتیی هێزە چەکدارەکانی عێراق ئاماژە بۆ ئەوە کراوە، کۆبوونەوەکەی ئەنجوومەنەکە کە لە وەزارەتەکانی ئەمنیی و سەربازیی و دەزگاکانیان پێکدێت "جەخت لەسەر رێکخستنی کاروانە سەربازییەکان لە رێگەی نووسراو بۆ جوڵە سەربازییەکان کراوە کە دەبێت لەلایەن فەرماندەیی ئۆپەراسیۆنە هاوبەشەکانەوە دەربچێت و بازگەکان بەدواداچوون بۆ ئەو بابەتە بکەن".
سەبارەت بە هەڵبژاردنی ئەنجوومەنی پارێزگاکانی عێراق، کە بڕیارە 18-12-2023 بکرێت، فەرماندەی گشتی هێزە چەکدارەکانی عێراق فەرمانی کرد، لێپێچینەوەی یاسایی لە هەموو ئەو کەسانە بکرێت کە تواناکانی دەوڵەت بۆ گوشارخستنە سەر دەنگدەران بەکاردەهێنن.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ