رووداو دیجیتاڵ
بەهۆی بەفربارینەوە، هاتووچۆی گەشتیاری لە دەروازەی نێودەوڵەتیی حاجی ئۆمەران راگیرا. بەرپرسانی دەروازەکانی باشماخ و پەروێزخان دەڵێن، هاتووچۆ لای ئەوانەوە ئاساییە.
دەروازەی نێودەوڵەتیی حاجی ئۆمەران لە پارێزگای هەولێر، ئێوارەی ئەمڕۆ دووشەممە لە راگەیێندراوێکدا رایگەیاند: "بەهۆی هاتنی بەفرێکی زۆر و سەختیی رێگەکان و نالەباری کەشوهەوا، لەلایەن دەروازەی (تەمەرچینی ئێران) ئاگادارکراینەوە کەوا بە هیچ شێوەیەک هاتووچۆی گەشتیاری لەدیوی ئێران نەماوە و تەواوی رێگەکان بەستوویانە".
دەروازەکە رایگەیاندووە: "داوا لە تەواوی گەشتیاران و هاووڵاتییانی هەرێمی کوردستان، عێراق و ئێران دەکەین، ئەگەر زۆر ناچار نەبن بۆ هاتووچۆ سەردانی دەروازەکەمان نەکەن".
مەریوان کەریم، گوتەبێژی دەروازەی نێودەوڵەتیی باشماخ لە پارێزگای سلێمانی، ئێوارەی ئەمڕۆ دووشەممە بە تۆڕی میدیایی رووداوی گوت: "بەهۆی بەفربارینەوە هیچ ئاستەنگییەک بۆ هاتووچۆ دروست نەبووە و هاتووچۆ بەردەوامە".
گوتەبێژی دەروازەی باشماخ گوتی: "هاتووچۆی گەشتیاری و بازرگانی 24 کاژێر بەردەوامە".
هەر ئەمڕۆ عەباس ئیسماعیل، سەرپەرشتیاری دەروازەی نێودەوڵەتیی پەروێزخان بە تۆڕی میدیایی رووداوی گوت: "هیچ ئاستەنگی و کێشەیەک لە دەروازەکەمان دروست نەبووە و هاتووچۆی گەشتیاری و بازرگانی بەردەوامە".
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ