دراوی عێراقی و لۆگۆی 'هەژماری من'
رووداو دیجیتاڵ
تیمی پڕۆژەی 'هەژماری من' رایانگەیاند، تائێستا 40%ی مووچەخۆر و خانەنشینانی سلێمانی لە پرۆژەکەدا تۆمار کراون، لە هەفتەی رابردووەوە کارەکانیان خێراتر کردووە و 800 کەس لە هەفتەیەکدا تۆمار کراون.
تیمی 'هەژماری من' ئەمڕۆ چوارشەممە 30-04-2025 بە تۆڕی میدیایی رووداوی راگەیاند، لە هەفتەی رابردووەوە رۆژانە نزیکەی 100 فەرمانبەر و مووچەخۆر لە پرۆژەکەیان لە سلێمانی تۆمار کراوە، لە کاتێکدا پێشتر رۆژانە نزیکەی 10 کەس تۆمار دەکران.
بەگوێرەی داتاکانی تیمی پڕۆژەکە کە بۆ رووداو نێردراوە، لە سلێمانی هیچ ئەندامێکی ئاسایش و هێزەکانی 70 تۆمار نەکراون، بەڵام 4256 پێشمەرگەی هێزەکانی 80، 3639 ئەندامی هێزەکانی زێرەڤانی و 9239 خانەنشین تۆمار کراون.
هاوکات 63 هەزار و 666 فەرمانبەری مەدەنی و زیاتر لە 44 هەزاری دیکەش لە هەموو چینەکانی دیکە تۆمارکراون، کۆی گشتی 125 هەزار و 461 فەرمانبەر و خانەنشین لە سلێمانی تۆمار کراون.
ئەوەش لە کاتێکدایە، تیمەکانی 'هەژماری من' دوو رۆژە گەڕاونەتەوە بۆ بانکی مەڵکەندی لە سلێمانی و خەریکی تۆمارکردنی فەرمانبەر و خانەنشینانن لە پڕۆژەکە.
لە پڕۆژەی 'هەژماری من' تاوەکو ئێستا لانیکەم 750 هەزار مووچەخۆر تۆمار کراون و 600 ئامێری راکێشانی پارەیش دانراون.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ