روودو دیجیتاڵ
دوای زیاتر لە دوو مانگ لە وەستانیان، سبەی گەشتی ئاسمانییەکانی نێوان کەرکووک و ئەنقەرە دەستپێدەکەنەوە.
رۆژی پێنجشەممە، 30ـی نیسانی 2026، هەردی سەمەد، بەڕێوەبەری راگەیاندنی فڕۆکەخانەی کەرکووک، بە تۆڕی میدیایی رووداوی راگەیاند، سبەی هەینی یەکی مانگی ئایار، گەشتی ئاسمانیی هێڵی ئاسمانی عێراقی لە فڕۆکەخانەی کەرکووکەوە بۆ ئەنقەرە دەستپێدەکاتەوە، کاژێر 9:45 خولەکی بەیانی فڕۆکە لە فڕۆکەخانەی کەرکووک دەفڕێت و کاژێر 3:45 خولەکی ئێوارە لە ئەنقەرە دەگەڕێتەوە.
بەڕێوەبەری راگەیاندنی فڕۆکەخانەی کەرکووک گوتی، سبەی فڕۆکەکە یەکەمجار لە فڕۆکەخانەی بەغدا دەفڕێت، لە کەرکووک دەنیشێتەوە، دواتر کاژێر 9:45 خولەکی بەیانی لە فڕۆکەخانەی کەرکووکەوە بەرەو ئەنقەرە بەڕێدەکەوێت.
هەردی سەمەد، ئاماژەی بەوەکرد، هێڵەکە هەفتانە سێ گەشتی بۆ ئەنقەرە دەبێت، لە بەغدا دەفڕێت و دواتر دێتە کەرکووک و پاشان بەرەو ئەنقەرە بەڕێدەکەوێت و بە پێچەوانەوە.
لە رابردوودا تەنیا هێڵی ئاسمانی عێراق و تورکیش ئێرلاین گەشتیان بۆ فڕۆکەخانەی کەرکووک هەبوو، تورکیش ئێرلاین ماوەکە گەشتەکانی بۆ عێراق راگرتووە، ئەو بەرپرسەی فڕۆکەخانەی کەرکووک ئاماژەی بەوەشکرد، دوای هەڵگیرسانی جەنگی ئەمریکا و ئیسرائیل لەگەڵ ئێران لە 28ی شوباتەەوە، هێڵی ئاسمانی عێراقیش گەشتەکانی لە فڕۆکەخانەی کەرکووک راگرت، بەڵام سبەی دوای زیاتر لە دوو مانگ گەشتەکانی دەستپێدەکاتەوە.
فڕۆکەخانەی کەرکووک لە 16ـی ئۆکتۆبەری 2022 بە ئامادەبوونی ناسر حوسێن، وەزیری گواستنەوەی ئەوکاتەی عێراق کرایەوە و یەکەم گەشتی نێودەوڵەتی لە هەمان مانگدا بەرەو تورکیا کرا.
پێشتر لە فڕۆکەخانەی کەرکووک هەفتانە نۆ گەشتی هاتن و چوون بۆ ئیستەنبووڵ و ئەنقەرە دەکران، گەشتی ناوخۆیی نەبوو.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ