رووداو دیجیتاڵ
سەرۆکی دەستەی دەستپاکیی هەرێمی کوردستان دەڵێت، بڕگەیەکی یاسای چاکسازیی هەرێمی کوردستان دەکەوێتە بواری جێبەجێکردنەوە کە هەر کەسێک بە پلەی وەزیر خانەنشین کرابێت و ئەو پلەیەی نەبووبێت، دەگەڕێندرێتەوە بۆ پلەی راستەقینەی خۆی؛ دەشڵێت، کەمکردنەوەی مووچەی خانەنشینی وەزیر و پەرلەمانتاران بۆ 50% بەگوێرەی یاساکە کەوتووەتە بواری جێبەجێکردنەوە.
رۆژی چوارشەممە 30ـی ئابی 2023، حاکم ئەحمەد ئەنوەر، سەرۆکی دەستەی دەستپاکیی هەرێمی کوردستان بە تۆڕی میدیایی رووداوی گوت، بەدواداچوونیان بۆ بڕگەیەکی یاسای چاکسازی لە هەرێمی کوردستان کردووە کە کارەکانی تەواو کراوە و فایلەکەی لە ئەنجوومەنی وەزیرانە، ئەویش تایبەتە بەو کەسانەی بە پلەیەک خانەنشین کراون و پلەی خۆیان نەبووە.
سەرۆکی دەستەی دەستپاکی دەڵێت، "لە هەرێمی کوردستان هەیە بە پلەی وەزیر خانەنشین کراوە و وەزیر نەبووە، ئەوە خانەنشینییەکەی دەگۆڕێت بۆ پلەی راستەقینەی خۆی کە چی بووە و بەگوێرەی ئەوە خانەنشین دەکرێت. بۆ ئەمەش تەنیا بڕیاری ئەنجوومەنی وەزیران ماوە و دەکەوێتە بواری جێبەجێکردنەوە".
حاکم ئەحمەد ئەنوەر ئاماژەی بەوەشکرد، بڕگەیەکی یاسای چاکسازی کەوتووەتە جێبەجێکردنەوە کە تایبەتە بە پلەی خانەنشینی پلە باڵاکان کە مووچەکەیان لە 80%ـی کۆی مووچەکەیانەوە کەمکراوەتەوە بۆ 50% بۆ 60%.
بەگوێرەی یاسای خانەنشینی بۆ مووچەی پلە باڵاکان کە وەکو سەرۆکی دەستەی دەستپاکی دەڵێت، مووچەی خانەنشینی وەزیر و پەرلەمانتاران کە پێشتر 80%ـی کۆی مووچەکەیان بووە کەمکراوەتەوە بۆ 50%ـی کۆی مووچەکەیان. حاکم ئەحمەد گوتیشی، "بەگوێرەی یاسای چاکسازی، مووچەی خانەنشینیی بەڕێوەبەری گشتی و بریکاری وەزیر لە 80%ـی کۆی مووچەکەیانەوە کەمکراوەتەوە بۆ 60%ـی کۆی مووچەکەیان".
یاسای چاکسازیی لە هەرێمی کوردستان ژمارە 2ـی ساڵی 2020، لە کۆبوونەوەی 16ـ1-2020 پەرلەمانی کوردستاندا دەنگی لەسەردرا. یاساکە لە 19 مادە و هۆیەکانی دەرچوونی پێکدێت و دوای پەسندکردنی لە رۆژنامەی وەقائیعی کوردستاندا بڵاوکراوەتەوە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ