رووداو دیجیتاڵ
بەرپرسێکی ئەمریکی رایگەیاند، مەحموود عەباس، سەرۆکی دەسەڵاتی فەلەستین لەنێو ئەو 80 بەرپرسەدایە کە بۆ بەشداریکردن لە کۆبوونەوەی مانگی داهاتووی کۆمەڵەی گشتیی نەتەوە یەکگرتووەکان لە ئەمریکا، ڤیزەیان پێنادرێت، لە کاتێکدا فەرەنسا سەرکردایەتیی هەوڵێک دەکات بۆ داننان بە دەوڵەتی فەلەستیندا.
یەکێتیی ئەورووپا داوای لە ویلایەتە یەکگرتووەکان کرد پێداچوونەوە بە بڕیارەکەیدا بکات.
رۆژی شەممە 30-08-2025 بەرپرسێکی وەزارەتی دەرەوەی ئەمریکا رایگەیاند: "عەباس لەنێو ئەو 80 کەسەیە بڕیاری ڤیزە نایانگرێتەوە."
یەکێتیی ئەورووپا داوای کرد واشنتن لە بڕیارەکەی پەشیمان بێتەوە. کایا کالاس، بەرپرسی سیاسەتی دەرەوەی بلۆکەکە، رایگەیاند: "بە لەبەرچاوگرتنی رێککەوتنەکانی نێوان نەتەوە یەکگرتووەکان و وڵاتی میواندار، ئێمە هەموومان داوا دەکەین پێداچوونەوە بەم بڕیارەدا بکرێت."
کالاس، بە پشت بەستن بە "یاسای نێودەوڵەتی"، داوای لە واشنتن کرد هەنگاوە نائاساییەکە هەڵبوەشێنێتەوە.
هەروەها ژان نوێل بارۆ، وەزیری دەرەوەی فەرەنسا، ناڕەزایەتیی خۆی دەربڕی و بە رۆژنامەڤانانی گوت: "نابێت کۆبوونەوەی کۆمەڵەی گشتیی نەتەوە یەکگرتووەکان هیچ رێگرییەکی لەسەر بێت."
بەپێی رێککەوتنێک وەک میوانداری نەتەوە یەکگرتووەکان لە نیویۆرک، ئەمریکا نابێت ڤیزە بەو بەرپرسانە نەدات کە بەرەو رێکخراوە جیهانییەکە دەڕۆن.
دەسەڵاتی فەلەستینیش بە هەمان شێوە داوای لە ئەمریکا کردووە بڕیارەکەی هەڵبوەشێنێتەوە و گوتی: "ئەم بڕیارە لەگەڵ یاسای نێودەوڵەتی و رێککەوتنی بارەگای نەتەوە یەکگرتووەکاندا، لە دژییەکیی ئاشکرادایە."
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ