وەزیرێکی کورد بڕیارێکی راکان جبووری لەبارەی نۆ فەرمانگەی کەرکووک هەڵدەوەشێنێتەوە

 

 

راکان جبووری، پارێزگاری کەرکووک بە وەکالەت رۆژی 19-11-2023، فەرمانی کارگێڕیی ژمارە (61)ی 2023 دەرکرد، کە تێیدا هاتووە، لەبەر بەرژەوەندی گشتی و جێبەجێکردنی بڕیاری دەستەی باڵای هاوئاهەنگی نێوان پارێزگاکان ژمارە 31ی 2023 و کارکردن بە مادەی 45ی یاسای پارێزگاکانی گرێنەدراو بە هەرێمەکان، ژمارە 31ی 2008 هەموار کراو بڕیاریانداوە:

 

یەکەم: ئەم فەرمانگانەی خوارەوە، دەبنە فەرمانگەی خۆجێی و گرێدراو دەبن بە دیوانی پارێزگا، پارێزگار وەک وەزیر دەبێت بۆ راییکردنی کاروباری کارگێڕیی، یاسایی، تەکنیکی و دارایی:

 

1- بەڕێوەبەرایەتیی شارەوانییەکانی کەرکووک

2- بەڕێوەبەرایەتیی شارەوانیی کەرکووک

3- بەڕێوەبەرایەتیی رێگا و پردەکانی کەرکووک

4- بەڕێوەبەرایەتیی ئاوی کەرکووک 

5- بەڕێوەبەرایەتیی ئاوەڕۆی کەرکووک 

6- فەرمانگەی نیشتەجێبوونی کەرکووک 

7- بەڕێوەبەرایەتیی پلانی شارنشینی کەرکووک 

8- فەرمانگەی باڵەخانەکانی کەرکووک

9- بەڕێوەبەرایەتیی پلاندانان و بەدواداچوون/ کەرکووک

 

دووەم: ئەم فەرمانگانەی سەرەوە، رێکارەکانی گواستنەوەی میلاکی وەزیفیان لە وەزارتەوە بۆ دیوانی پارێزگا تەواو دەکەن بە هاوئاهەنگی لەگەڵ بەشی بەڕێوەبردنی سەرچاوەی مرۆیی لە دیوانی پارێزگا.

 

سێیەم: ئەم فەرمانگانە هەموو بڕیارەکانی دەستەی باڵای هاوئاهەنگی نێوان پارێزگاکان بە وردی جێبەجێ دەکەن کە هاوپێچ کراون.

 

لەوبارەوە، عەدنان شوکر، گوتەبێژی شارەوانیی کەرکووک، رۆژی پێنجشەممە 30-11-2023، بە تۆڕی میدیایی رووداوی راگەیاند، "نووسراوەکەی راکان جبووریمان بەدەستگەیشتووە، بەڵام لە بەرامبەردا نووسراوی وەزارەتی ئاوەدانکردنەوە و نیشتەجێبوون و شارەوانییەکانی عێراقمان بەدەستگەیشتووە کە ئەو بڕیارە هەڵدەوشێنێتەوە و جەخت لەوەدەکاتەوە بڕیاری دەستەی باڵای هاوئاهەنگی نێوان پارێزگاکان، پارێزگای کەرکووک ناگرێتەوە".

 

بەگوێرەی نووسراوێک کە وێنەیەکی دەست تۆڕی میدیایی رووداو کەوتووە، رۆژی 20-11-2023، مەتین جادرچی، بریکاری وەزارەتی ئاوەدانکردنەوە و نیشتەجێبوون و شارەوانییەکانی عێراق نووسراوی بۆ ئەو نۆ بەڕێوەبەرایەتییەی کەرکووک کردووە و دەڵێت، "بەنگین رێکانی وەزیری ئاوەدانکردنەوە و نیشتەجێبوون و شارەوانییەکان رایسپاردوون، کەرکووک بڕیاری ژمارە 31ی 2023ی دەستەی باڵای هاوئاهەنگی پارێزگاکان نایگرێتەوە، بەڕێوەبەرایەتییەکانتان ناوەندین و بە وەزارەتەوە گرێدراون بۆ کاروباری (کارگێڕیی، دارایی، یاسایی و تەکنیکی)". 

 

 لە نووسراوەکەی وەزارەتی ئاوەدانکردنەوە جەخت لەوە کراوەتەوە کە "بە وردیی کاری پێ بکەن و پێوەی پابەند بن" .