رووداو دیجیتاڵ
نێچیرڤان بارزانی، سەرۆکی هەرێمی کوردستان، پێشوازیی لە جەنەراڵ کیڤن لامبێرد، فەرماندەی گشتیی هێزەکانی هاوپەیمانان لە عێراق و سووریا کرد و لە کۆبوونەوەکەدا هەردوولا هاوڕابوون کە داعش هێشتا "مەترسییەکی راستەقینەیە" و جەختیان لە بەردەوامیی ئەرکی هێزەکانی هاوپەیمانان کردەوە.
بەپێی راگەیێندراوێکی سەرۆکایەتیی هەرێمی کوردستان، رۆژی پێنجشەممە 31-07-2025، لە کۆبوونەوەکەدا کە وەزیری پێشمەرگە و کۆنسووڵی گشتیی ئەمریکا ئامادەی بوون، دواپێشهاتە ئەمنییەکان و جموجووڵەکانی داعش تاوتوێ کراون.
لەبارەی هەڕەشەکانی داعشەوە، هەردوولا رایانگەیاندووە، "پێویستە هەموو لایەنە پەیوەندیدارەکان هاریکاری و هەماهەنگی بکەن بۆ رووبەڕووبوونەوەیان" و بۆ ئەو مەبەستەش مانەوە و بەردەوامیی ئەرکی هێزەکانی هاوپەیمانیی نێودەوڵەتییان بە "پێویست" زانیوە.
تەوەرێکی دیکەی کۆبوونەوەکە، پرۆسەی یەکخستنەوەی هێزی پێشمەرگە و چاکسازی لە وەزارەتی پێشمەرگە بوو، کە بە ئامادەبوونی وەزیری پێشمەرگە و سوپاسالار بەڕێوەچوو.
لەبارەی دۆخی سووریا، سەرۆکی هەرێمی کوردستان و فەرماندەی هاوپەیمانان جەختیان کردەوە کە پێویستە "کورد و پێکهاتەکانی دیکە هاوبەشێکی کارای ئێستا و داهاتووی وڵاتەکەیان بن."
دوا پێشهاتەکانی رۆژهەڵاتی نێوەڕاست و پەیوەندییەکانی عێراق و هەرێمی کوردستان لەگەڵ وڵاتانی دراوسێ، تەوەرێکی دیکەی گفتوگۆکان بوو.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ