حکومەت بوونی سەربازگەی ئیسرائیل لە هەولێر رەتدەکاتەوە

رووداو - هەولێر

گوتەبێژی حکومەتی ھەرێمی کوردستان بوونی سەربازگەیەکی ئیسرائیل لە هەولێر رەتدەکاتەوە و دەڵیت، هەواڵێکی بێ بنەمایە.

لە روونکردنەوەیەکدا کە ئەمڕۆ (شەممە 31-8-2019) بڵاوکراوەتەوە، جووتیار عادل، گوتەبێژی حکومەتی ھەرێمی کوردستان رایگەیاند "لە ھەندێ کەناڵی میدیایی عێراقی ئیدیعای ھەبوونی سەربازگەیەکی ئیسرائیلی لە هەولێر کراوە، کە گوایە ژەنەرالێکی ژن بەڕێوەی دەبات".

جووتیار عادل دەڵێت "حکومەتی هەرێمی کوردستان سەرلەبەری ئەم هەواڵە بێ بنەمایە رەتدەکاتەوە. پێمانوایە ئەمە تەنیا پڕوپاگەندەیەکی سیاسی بێ بەھایە و ئامانجی بەلاڕێدابردنی راستییەکانە بۆ قازانج و دەستکەوتی شەخسی".

ئەکرەم کەعبی، ئەمینداری گشتیی بزووتنەوەی نوجەبا رایگەیاندبوو، ئیسرائیلییەکان بە پاسپۆرتی ساختەی ئەمریکی دێنە عێراقەوە، ئاگاداری شوێنەکانی مانەوەیانن لە باڵیۆزخانەی ئەمریکا و بنکەی عەین ئەسەد، هەروەها ژنێکی ئیسرائیلی کە پلەکەی ژەنەراڵە هاتووەتە عێراق و بنکەیەکی سەربازی لە هەولێر هەیە.


دەقی روونکردنەوەکە:

لە ھەندێ کەناڵی میدیایی عێراقی ئیدیعای ھەبوونی سەربازگەیەکی ئیسرائیلی لە هەولێر کراوە کە گوایە ژەنەڕالێکی ژن بەڕێوەی دەبات.

حکومەتی هەرێمی کوردستان سەرلەبەری ئەم هەواڵە بێ بنەمایە رەتدەکاتەوە و پێمانوایە ئەمە تەنیا پروپاگەندەیەکی سیاسی بێ بەھایە و ئامانجی بەلاڕێدابردنی ڕاستییەکانە بۆ قازانج و دەستکەوتی شەخسی.

جووتیار عادل،
گوتەبێژی حکومەتی ھەرێمی کوردستان
31 ئاب 2019

• به‌شی بكه‌ لە
• Share on Facebook
• Share on Twitter
• Share on Whatsapp
• Share on Telegram
• Share on Viber
• Share on Messenger