رووداو دیجیتاڵ
لە رۆژهەڵاتی کوردستان 4 کەس بە رووداوی هاتووچۆ گیانیان لەدەستدا و 6 کەسی دیکەش بریندار بوون.
ئێوارەی دوێنێ لە نزیک شاری پۆلدەشتی پارێزگای ورمێی رۆژهەڵاتی کوردستان لە ئەنجامی وەرگەڕانی ئۆتۆمبێلێکی تایبەت لە جۆری پیژۆ پارس، 2 کەس گیانیان لەدەستدا.
محەممەدنەژاد، بەڕێوەبەری پۆلیسی ماکۆ و پۆلدەشت لەو بارەیەوە رایگەیاند، 3 کەس لە ئۆتۆمبێلەکەدا بوون، دووانیان گیانیان لەدەستداوە و ئەوی دیکەش برینداربووە.
بەڕێوەبەری پۆلیسی ماکۆ و پۆلدەشت، تیژڕۆیی و لەدەستدانی کۆنترۆڵی ئۆتۆمبێلەکەی بە هۆکاری رووداوەکە ناوبرد.
لە رووداوێکی دیکەدا لە نزیک شاری (شۆت)ی سەر بە پارێزگای ورمێ، ئۆتۆمبێلێکی تایبەت وەرگەڕا و 5 سەرنشینەکەی بریندار بوون.
حەمید مەحبووبی، بەڕێوەبەری گشتیی خاچی سووری پارێزگاکە گوتی، رووداوەکە کاژێر 18:41ـی ئێوارە بە کاتی ورمێ (18:11 بەکاتی هەولێر) روویداوە.
حەمید مەحبووبی گوتیشی، هەر پێنج سەرنشینی ئۆتۆمبێلەکە دوای گوێزراونەتەوە نەخۆشخانە.
هاوکات لە نزیک شاری خوڕەمئاوای پارێزگای لوڕستانیش ئۆتۆمبێلێک لە جۆری پیژۆ 405 وەرگەڕا و بەو هۆیەوە دوو کەس گیانیان لەدەستدا.
محەممەد زارعی، بەڕێوەبەری پۆلیسی پارێزگاکە دەڵێت، دوو سەرنشینەکە خەڵکی پارێزگایەکی دراوسێی لوڕستان بوون و تیژڕۆیی و لەدەستدانی کۆنترۆڵی بە هۆکاری رووداوەکە دانا.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ